Laxa- og brauðtertustuð í Dölunum

Laxá í Dölum var opnuð í morgun. Sami hópurinn hefur opnað hana í tíu ár samfellt núna og var haldið upp á það með eftirminnilegum hætti. Brauðterta í sverari kantinum var í morgunmat með tilheyrandi kertum til að blása á. 

Á mjög svipuðum tíma settu Þórir Örn Ólafsson og Harpa Hlín Þórðardóttir í góða laxa. Annars vegar í 76 cm í Króknum og vildi Collie Dog og hins vegar í 88 cm í Mjóhyl sem stóðst ekki rauðan Franceskón. Þórir Örn var hins vegar á undan að setja sína mynd á facebook og það er það sem skiptir máli í dag. Hann er því skráður fyrir fyrsta laxinum í Laxá í Dölum sumarið 2023.

Stefán Sigurðsson er sjúkur í brauðtertur að sögn viðstaddra. Hér blæs hann á hátíðarkökuna í tilefni þess að sami hópurinn var að opna ána í tíunda skiptið í röð. Ljósmynd/Harpa Hlín

Harpa Hlín fékk eins og áður segir lax um svipað leyti og var það í Mjóhyl. Tveir góðir laxar misstust snemma um morguninn og var það bæði í Dönustaðagrjótum og Höskuldsstaðastrengjum.

Hópurinn sem opnar Dalina var að mæta í tíunda skipti og því var fagnað með brauðtertu sem skreytt var meðal annars með sex gjöfulustu flugunum úr Kristnapolli í gegnum árin hjá opnunarhollinu. Stefán Sigurðsson fékk þann heiður að blása á kertin tíu. „Hann er sjúkur í brauðtertur,“ sagði Sara Pétursdóttir sem tók að sér fimmta árið í röð að útbúa enn eina majonesveisluna fyrir hópinn.

Harpa með fiskinn úr Mjóhyl. 88 sentímetrar. Tók rauðan Frances kón. Ljósmynd/Stefán Sigurðsson

Laxá er í fínu vatni en það heldur betur volgnaði þegar leið á morguninn og var hiti kominn í 22 gráður yfir miðjan daginn.

Fiskur sást á öllum svæðum og ljóst að nokkuð er síðan þeir fyrstu gengu í Dalina. Samkvæmt fiskifræðingum er Laxá i Dölum sú á sem á hvað mest inni og hafa þeir varfærnu menn sagt að búast megi við því að áin fari í tvö þúsund laxa þegar aðstæður verða réttar. Ágæt sumarveiði í Dölunum telst vera í kringum þúsund laxar.

Tuttugu og tvær gráður í Dölunum. Opnunarhollið var búið undir það. Frá vinstri: Guðný María Jóhannsdóttir, Gunnar Egill Sigurðsson, Berglind Steinarsdóttir, Ævar Sveinsson, Þórir Örn Ólafsson, Ásdís Björg Jónsdóttir, Stefán Sigurðsson og Harpa Hlín Þórðardóttir Ljósmynd/ÞÖÓ

Brauðtertan sem var ákveðinn hápunktur í opnun í morgun inniheldur: Skinku, aspas, egg og Gunnars-majónes. Þá var notaður slatti af jarðarberjum að sögn Þóris Ólafssonar.

• Blogga um frétt

Seinustu hundraðkallar sumarsins