Afskaplega köflótt laxveiðitímabil

Sex aflahæstu laxveiðiárnar á Íslandi í sumar eru allar með verulega lakari veiði en á síðasta ári. Þetta sýna glóðvolgar veiðitölur á angling.is. Það er ekki fyrr en komið er að Vopnafjarðaránum sem sitja í sjöunda og níunda sæti, að betri veiði en á sama tíma í fyrra, blasir við. 

Þetta veiðisumar er vægast sagt köflótt, og sérstaka athygli vekur að Norðurá gaf ekki nema 35 laxa í síðustu viku. Sama vika í fyrra skilaði 110 löxum þessari Borgarfjarðarperlu. Leitað var staðfestingar hvort þetta væri rétt tala og má sjá á rafrænu veiðibókinni á angling iq að þetta er raunin.

Rangárnar eru báðar að taka við sér og gáfu viku veiði sem var vel yfir tvö hundruð laxa. Þó er rétt að geta þess að Ytri–Rangá og það svæði sem fellur undir talninguna er með helmingi minni veiði en á sama tíma í fyrra. Í Eystri er veiðin nær því sem var í fyrra en töluvert vantar samt upp á.

Hrafn H. Hauksson með stórlax úr opnun Stóru-Laxár. Veiðin þar hefur verið mun lakari en í fyrra. Ljósmynd/Stóra - Laxá

Urriðafoss er ekki að eiga gott ár og vantar verulega upp á að svæðið hafi gefið jafn marga fiska og í fyrra. Þar skeikar tvö hundruð fiskum svo þetta tímabil nái veiðinni eins og hún var í fyrra.

Ágæt veiði var samt í vikunni af nokkrum af þekktustu ánum. Selá gaf 165 laxa, Hofsá 151, Miðfjarðará 146 og Langá 136 laxa.

Rétt er að hafa í huga að samanburðarárið 2022 var tæplega meðalár þegar kemur að laxveiði.

Þegar leitað er að ám sem eru að gera betur en í fyrra er sem betur fer hægt að nefna nokkrar. Laxá í Aðaldal er með 229 á móti 192 í fyrra. Vatnsdalsá er með 148 á móti 124 í fyrrasumar. Skjálfandafljót, neðri hluti hefur gefið 245 laxa en var í 178 þann 27. júlí í fyrra.

En því miður er þau mun fleiri dæmin þar sem veiðin er miklu lélegri en í fyrra. Stóra–Laxá í hreppum er nú komin með 129 laxa en stóð í 340 í fyrra á þessum tíma. Margar aðrar ár eru í þeim sporum. Má þar nefna Grímsá, Laxá í Kjós og Laxá í Dölum sem allar eru hálfdrættingar á við tölurnar frá í fyrra.

Þessar eru afla­hæstar samkvæmt tölum frá angling.is, sem er síða Landssambands veiðifélaga. Listann má sjá hér að neðan. Í fyrsta dálki er fjöldi laxa veidd­ur og miðast sú tala við 26. júlí. Í dálki tvö er svo viku­veiðin. Þriðji dálk­ur­inn, inn­an sviga, er fjöldi laxa á sama tíma í fyrra. Töl­ur fyr­ir þenn­an lista yfir tíu afla­hæstu árn­ar eru fengn­ar af vef Lands­sam­bands veiðifé­laga, angling.is og einnig af angling iq app­inu þar sem ra­f­ræn skrán­ing á veiðinni fer fram. Upp­lýs­ing­ar um stöðuna í fleiri ám má nálg­ast á báðum þessum síðum. Elliðaárnar fengu að fljóta með sem sú ellefta þar sem spennandi verður að sjá hvort þær miklu laxagöngur sem hafa mælst í ánni, skili sér í veiði. Það hefur ekki gerst enn.

Þverá/​Kjar­rá        668          128        (865)      

Ytri-Rangá og       618          272       (1182)

vest­urb. Hóls­ár 

Norðurá               588           35        (801)

Eystri-Rangá        583          232        (855)

Urriðafoss            563           55         (762)

Haffjarðará          447            90         (497)

Selá í Vopnafirði    438           165        (397)

Miðfjarðará           409           146         (452)

Hofsá                   383            151        (364)

Langá á Mýrum     351            136        (525)

Elliðaárn­ar            343            65         (457)   

Angling.is birtir vikulega tölur úr öllum laxveiðiánum.

• Blogga um frétt

Seinustu hundraðkallar sumarsins