Veiði | mbl | 28.7.2023 | 8:14

Friða laxinn í september í Alviðru

Ingólfur Ásgeirsson með fallegan tveggja ára lax úr Bíldsfelli í Soginu fyrr í mánuðinum. Nú hefur verið ákveðið að stytta veiðitímann á Alvirðusvæðinu í Soginu. Ekki verður veitt þar í september, Ljósmynd/Starir

Starir ehf, sem leigja stærstan hluta Sogsins og Landvernd sem er eigandi að hluta Sogsins hafa gert með sér samkomulag um fleiri skref til uppbyggingar laxastofnsins í ánni. Tekur samkomulagið til svæðisins sem kennt hefur verið við Alviðru og er eins og fyrr segir í eigu Landverndar.

Í sumar verður veiðitíminn í Alviðru styttur og mun veiðitímabilinu ljúka 1. september en ekki standa fram til 20. eins og reglan hefur verið. Er markmiðið með þessari breytingu að gefa laxinum frið þegar nær líður hrygningu og stuðla þannig að uppbyggingu stofnsins. Sá hluti Sognstofnsins sem „átt hefur heima“ í Alviðru hefur verið í lægð síðustu árinu. „Við erum að stíga mörg skref þessi misserin til að tryggja endurreisn laxastofnsins í Soginu.NASF hefur stýrt árangursríku verkefni um uppkaup laxaneta á Ölfusár- og Hvítársvæðinu í samvinnu við leigutaka og landeigendur á svæðinu. Við sjáum það vera byrjað að skila árangri víða á þessu stóra og mikla vatnasvæði sem geymir margar laxveiðiár. Alviðra í Soginu er hins vegar í viðkvæmri stöðu og það var samdóma álit okkar og Landverndar að nauðsynlegt væri að fara í frekari aðgerðir á því svæði. Þetta eykur líkurnar á því að hrygning takist vel og það skili sér á næstu árum í sterkari stofni,“ upplýsti Ingólfur Ásgeirsson hjá Störum í samtali við Sporðaköst.

Árni Baldursson hefur verið iðinn við kolann á Ásgarðssvæðinu í Soginu síðustu daga. Hann hefur veitt vel og telja bæði hann og Ingólfur Ásgeirsson að netauppkaup undir forystu NASF séu byrjuð að skila árangri. Ljósmynd/Árni Baldursson

Veiði í Soginu hefur verið betri í sumar en í fyrra. Bæði Bíldsfell og Ásgarður hafa verið að gefa ágæta veiði á köflum og er Bíldsfellið þegar búið að skila fleiri löxum en allt veiðitímabilið í fyrra. Sömu sögu er að segja um Alviðru en þar ætla menn að horfa til lengri tíma.

Ingólfur Ásgeirsson hefur mikinn metnað fyrir endurreisn laxins í Soginu og það er hans mat að hlutirnir séu að þróast í rétta átt. „Ég hef sjálfur veitt þarna nokkra daga í sumar og líka verið í leiðsögn. Ég sé mjög jákvæða hluti vera að gerast og laxagengd á þessum efstu svæðum hefur verið að aukast. Það er mikið ánægjuefni fyrir mig persónulega því ég hef mjög sterkar taugar til Sogsins og veiddi mikið í ánni þegar ég var að byrja minn veiðiskap. Vonandi sjáum við þessa hluti þróast áfram til betri vegar og þá geta verið góðir tímar framundan í Soginu,“ sagði Ingólfur.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.