Laxi númer þúsund fagnað með pönnukökum

Emily Mathews veiddi þúsundasta laxinn í Ytri–Rangá laust fyrir klukkan tíu í morgun í veiðistaðnum Breiðabakka í Ytri–Rangá. Þessu var fagnað að þjóðlegum sið með pönnukökum og marengstertu. Eins gott bakkelsi og gerist á góðum íslenskum heimilum.

Anna María Kristjánsdóttir bakaði pönnukökurnar og hurfu þær eins og dögg fyrir sólu. Veiðin hefur verið að aukast í Ytri–Rangá og eftir því sem Sporðaköst komast næst er Ytri fyrsta veiðiáin sem kemst í þúsund laxa.

Þetta er alltaf merkilegur áfangi og þá ekki síst í ári þar sem almennt er dræm veiði á landinu. Veiðin í Ytri er þannig mun minni en í fyrra.

Emily og Abe alsæl með lax sem þau veiddu í dag í Ytri-Rangá. Ljósmynd/IO

Emily og leiðsögumaðurinn hennar áttuðu sig ekki á að laxinn sem þau lönduðu í sameiningu var sá þúsundasti. Það kom ekki í ljós fyrr en í hléinu. Því er ekki til mynd af henni með laxinn. Hins vegar hefur hún veitt vel í Ytri í hollinu sem nú er að störfum þar. Með fréttinni fylgir mynd af Emily og Abe Mathews með fallegan nýgenginn lax sem þau veiddu í dag.

Þegar Harpa Hlín Þórðardóttir var spurð hvort að það væri mokveiði hjá þeim spurði hún á móti. „Hvað er mokveiði? Það er svo afstætt. Hér er mjög fín veiði og hlaupa dagarnir á fimmtíu til níutíu löxum,“ sagði Harpa og vissulega er það mjög fín veiði.

• Blogga um frétt

Seinustu hundraðkallar sumarsins