Hávær orðrómur um húkk í Urriðafossi

Hávær umræða hefur verið um húkk á laxi í Urriðafossi. Flestir vita hvað húkk er, en það er þegar öngull lendir í fiski og hann er dreginn inn með þeim hætti. Netabændur við Þjórsá hafa frá því að stangveiði hófst kvartað undan að særður fiskur hafi verið að koma í netin. Pálmi Jónsson skrifaði inn á Veiðidellan er frábær, á Facebook að hann hafi fengið lax með öngli í, í net sem hann var að vitja um fyrir neðan Urriðafoss.

Stefán Sig­urðsson leigutaki svæðis­ins við Urriðafoss, með fyrsta lax sumarsins 2021. Stefán segir að hert hafi verið á veiðireglum í kjölfar þess að þessi orðrómur kom upp á sínum tíma. mbl.is/Einar Falur

Stefán Sigurðsson sem er með Urriðafoss á leigu í gegnum fyrirtæki sitt Iceland Outfitters, kannast við þessa umræðu en segir að húkkveiði sé bönnuð í Urriðafossi og skerpt hafi verið á ýmsum atriðum til að sporna við mögulegu húkki. „Við höfum bannað spúna veiði og minnkað þá króka sem leyfilegt er að nota í fluguveiði í Urriðafossi. Hins vegar er oft ótrúlega mikið af laxi á litlum afmörkuðum stöðum í Urriðafossi að það mun alltaf eitthvað húkkast. En við erum með veiðireglur til að sporna gegn þessu. Við erum líka með öfluga veiðivörslu sem Haraldur Einarsson sér um,“ sagði Stefán í samtali við Sporðaköst. Hann viðurkennir að kannast við þessa umræðu og einmitt vegna hennar hafi verið skerpt á öllum veiðireglum.

Ýmsir tjá sig við færsluna frá Pálma, sem nefnd er hér að ofan. Þar skrifar Tómas Skúlason sem rekur Veiðiportið. „Ég er að verða uppseldur í þríkrækjum 4/0 og 5/0. Svo eru menn að banna sökktauma og túpur annarsstaðar. Ég fullyrði af 9 af hverjum 10 löxum eru dregnir inn á lopapeysunni þarna,“ skrifar Tómas. 

Lopapeysan sem Tómas vitnar til er yfirfærð merking þegar þríkrókur lendir utan í fiski og hann er dreginn þannig inn. 

Áhugavert væri að heyra frá mönnum sem hafa verið í Urriðafossi undanfarið, hvað sé til í þessum orðrómi.

• Blogga um frétt

Seinustu hundraðkallar sumarsins