Sú fluga, eða flugufjölskylda sem gefið hefur langflesta laxa á Íslandi í sumar er Sunray. Hún er ýmist bókuð sem Sunray, Sunray Shadow eða Sun ray. Þegar tölur eru skoðaðar úr helstu ánum er Sunray undantekningalítið í efsta sæti. Rafræna veiðibókin Angling iQ heldur saman tölfræði yfir þetta.
Selá í Vopnafirði hefur gefið 565 laxa. Þar af eru 143 bókaðir á Sunray. Í Hofsá er hlutfallið svipað 120 af 551 laxi hafa tekið einhverja útgáfu þessarar vinsælu flugu. Meira að segja Laxá í Aðaldal er komin í Sunray klúbbinn. Af 321 laxi hafa flestir er 66 tekið Sunray. Liðinn er sá tími að menn notuðu eingöngu Aðaldalsflugur í drottningunni.
Drottningin á Vesturlandi, Norðurá er með 159 laxa bókaða á Sunray af 665 löxum.
75 laxar í Víðidalsá hafa tekiðSunray, af samtals 324 fiskum. Í Jöklu er þetta hlutfall um 25% en ríflega hundrað af 430 löxum hafa látið glepjast af þessari útfærslu í fluguveiði.
Er nú öldin önnur þegar Frances flugur voru ávallt í efstu sætum þegar þessi tölfræði var skoðuð. Þó er svört Frances í efsta sæti í Laxá í Kjós með 27 skráningar af 219 löxum. Hítará er með systur hennar í efsta sæti en þar er rauð Frances flugan sem gefið hefur flesta fiska, eða 43.
En það sem af er sumri kemst engin fluga með tærnar þar sem Sunray hefur hælana. Áhugavert er hins vegar að skoða hvaða flugur eru í sætunum fyrir neðan. Þar er mjög algengt að sjá Frances fljótlega á listanum. En aðrar koma svo sannarlega við sögu. Flugan Arion er í fimmta sæti í Norðurá.
Haugurinn er aldrei langt undan og sama má segja um margvíslegt hitch. Aðrar sem hafa verið að skora vel í sumar eru Green But, Black Brahan, Collie Dog, Silver Sheep, Valbeinn og Evening Dress.
Með þessar flugur í boxi ættu veiðimenn að hafa góða möguleika á að setja í lax og muna bara í vatnsleysinu að litlar flugur stær tólf til sextán er mun vænlegri til árangurs en stórar og þungar túbur. Laxinn sér þær vel þó að þær séu litlar og allt sem er á yfirborðinu kemur inn í hans sjónsvið. Oftar en ekki snýst þetta um að hafa trú á smáfluguveiði. Þær aðstæður sem nú ríkja bjóða eingöngu upp á smáar flugur. Það getur breyst síðar í sumar ef langþráð rigning verður í boði.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |