Hnúðlax fundist í flestum ám í sumar

Hnúðlax hefur fundist í laxveiðiám í öllum landshlutum síðustu vikurnar og einkum síðustu daga. Það er fljótlegra að telja upp þær ár þar sem ekki hefur bókaður slíkur fiskur í sumar. Aukning á bókunum hefur verið mikil síðustu daga og kemur það heim og saman við fyrri ár, þar sem sá bleiki hefur verið að mæta síðustu vikuna í júlí og fyrstu viku í ágúst.

Eins og komið hefur fram þá mætir þessi hnúðlaxastofn á oddatöluárum og stafar það af því að lífsferill hans er tvö ár. Næsta hnúðlaxaár verður 2025 en þá mun sá fiskur ganga í árnar sem verður til úr hrygningu nú í haust.

Staðfest voru hnúðlaxaseiði í öllum þeim ám sem Hafrannsóknastofnun rannsakaði í fyrra. Búast má við að hnúðlaxinn hrygni í sífellt fleiri íslenskum ám og að hann verði viðvarandi. Hvort sem menn vilja kalla hann vandamál eða viðbót.

Hnúðlaxinn virðist ganga í torfum og þar sem hans verður vart má reikna með að þeir séu margir saman. Veiðimenn hafa talað um við Sporðaköst að svo virðist sem takan detti niður fljótlega eftir að fiskurinn gengur í ána.

Einar Margeir Kristinsson var að veiða Syðri–Brú í Soginu og lenti hann í „hnúðlaxaveislu“ eins og hann orðaði það í samtali við Sporðaköst. „Við lönduðum þremur og misstum mun fleiri. Stærsti var 60 sentímetrar og hann rétti úr þríkrækjunni. Það er alveg ótrúlegur kraftur í þessum kvikindum. Við fengum einn venjulegan lax líka og hann var eins og að draga urriðatitt.“

Mest verður vart við hnúðlaxinn neðarlega á ársvæðum enda er hann ekki jafn mikill sundfiskur og laxinn okkar. Hann er með minni sporð og á því erfiðara með fossa en frændi hans.

Flestir hnúðlaxar sem bókaðir hafa verið í sumar eru enda að koma af neðstu hlutum ánna. Silungasvæðin í ám Norðanlands hafa verið að gefa meira af honum en efri hlutar.

• Blogga um frétt

Seinustu hundraðkallar sumarsins