Verður rólegt í veiðinni þar til rignir

Rólegheit eru yfir laxveiðinni enn eina vikuna. Nýjar vikurtölur sem birtust í gær á angling.is staðfesta það. Sem fyrr eru það Selá og Hofsá sem eru gefa betri veiði en á sama tíma í fyrra. Þá er Haffjarðará einnig á góðu róli í samanburði milli ára. 

Báðar Rangárnar eru nú komnar í þriggja stafa tölu en eru langt undir því sem þær voru að gefa í fyrra. Jökla er einungis með fjögurra laxa veiði í vikunni 2. – 9. ágúst og stafar það af því að hún er komin á yfirfall og verður kolmórauð og óveiðanleg. Þá tekur við veiði í hliðarám sem hefur síðustu ár verið dræm.

Það verður veiðiveisla í einhverjum ám á komandi vikum. En til þess að það gerist þarf að gera gjörningaveður með mikilli rigningu. Sem stendur er slíkt veður ekki í kortunum og veðurkortin eru uppfull af sólarmerkjum en rigningardropar sjást ekki. Vatnavextir eru nauðsynlegir til að veiðin glæðist á ný. Þá mun fiskurinn færa sig og jafnvel leggja í að ganga í annars vatnslitlar ár. Það mun gefa góða veiði þegar það loksins gerist. Fram að því eru það bara smáar flugur og nýta morgnana vel.

Frá Haffjarðará. Hún heldur sínu og er að gefa sömu veiði og í fyrra. Er hún nánast einsdæmi á Vesturlandi hvað það varðar. Ljósmynd/Aðsend

Þessar eru afla­hæstar samkvæmt tölum frá angling.is, sem er síða Landssambands veiðifélaga. Listann má sjá hér að neðan. Í fyrsta dálki er fjöldi laxa veidd­ur og miðast sú tala við 9. ágúst. Í dálki tvö er svo viku­veiðin. Þriðji dálk­ur­inn, inn­an sviga, er fjöldi laxa á sama tíma í fyrra, eða 10. ágúst. Töl­ur fyr­ir þenn­an lista yfir tíu afla­hæstu árn­ar eru fengn­ar af vef Lands­sam­bands veiðifé­laga, angling.is og einnig af angling iq app­inu þar sem ra­f­ræn skrán­ing á veiðinni fer fram. Upp­lýs­ing­ar um stöðuna í fleiri ám má nálg­ast á báðum þessum síðum. Elliðaárnar fengu að fljóta með en margar fréttir hafa verið gerðar í sumar um mikla laxagengd í ána. Það er ekki að skila sér í veiðitölum. Ekki enn allavega.

Ytri-Rangá og      1.419        334       (2.090)

vest­urb. Hóls­ár 

Eystri-Rangá       1.170        246      (1.694)

Þverá/​Kjar­rá        829           88        (1.068)      

Norðurá               719           61        (996)

Selá í Vopnafirði   688          162         (637)

Miðfjarðará          680          124         (837)

Urriðafoss            661           --          (849)

Haffjarðará          642            85        (635)

Hofsá                  623           108        (498)

Jökla                    433            4          (520)

Langá á Mýrum     433            36        (650)

Elliðaárn­ar            419            44         (581)   

Angling.is birtir vikulega tölur úr öllum laxveiðiánum.

• Blogga um frétt

Seinustu hundraðkallar sumarsins