Fjölmennasta kvennahollið til þessa

Fjölmennasta kvennaholl sem Sporðaköst hafa vitneskju um er nú að veiða í Ytri–Rangá. Samtals eru 37 konur við veiðar og hefur verið mikið fjör og meiri veiði.

Sunneva Sigurðardóttir með 81 sentímetra hæng. Þessi var lúsugur og er gaman að sjá að tveggja ára fiskurinn er enn að ganga. Ljósmynd/IO

Harpa Hlín Þórðardóttir hjáIcelandOutfitters sem annast sölu og rekstur á Ytri–Rangá segir þetta hafa verið dásamlega daga. En það var einmitt Harpa sem hafði veg og vanda að skipulagningu á hollinu. „Veiðikonur eru svo skemmtilegar og mig langaði að kynnast fleiri veiðikonum meðal annars til að eignast fleiri veiðifélaga til framtíðar. Þetta eru breyttir tímar og fyrir tíu árum hefði ég átt í vandræðum með að finna nokkrar konur til að fara með. Síðustu ár hefur þetta verið að breytast mikið og sérstaklega eftir þetta holl er ég með langan lista yfir skemmtilegar konur sem verður gaman að veiða með í framtíðinni,“ sagði Harpa Hlín í samtali við Sporðaköst.

Jólaþemað sló í gegn. Jól í Ytri á miðju sumri. Einn stærsti hópur kvenna sem farið hefur saman í veiði. Gleðin var mikil en veiðin enn meiri. Ljósmynd/IO

Áhugi kvenna á stangveiði hefur vaxið hröðum skrefum síðustu ár og eru til fjölmargir veiðiklúbbar kvenna sem margir hverjir eru fjölmennir. Án efa er þó veiðiklúbburinn Árdísir fjölmennastur en sá félagsskapur telur um hundrað konur.

Hópurinn var að gera hörkuveiði. Hér eru Bára Einarsdóttir, Harpa Hlín, Hildur Harðardóttir sem fékk maríulax og Svetlana Moroshinka. Samtals var hollið komið 57 laxa eftir fyrstu þrjár vaktirnar. Ljósmynd/IO

Fyrstu vaktina landaði hollið sautján löxum og missti annað eins. Samsetning á afla var allt frá legnum smálaxi yfir í lúsuga stórlaxa og allt þar á milli.

Það hefur gjarnan loðað við kvennahollin að þar er meiri dagskrá en gerist og gengur. Margfræg eru þemakvöld kvenna í veiðihúsum og ekki vantaði það í þessari ferð. Jólin voru þema síðari kvöldsins og var ekkert til sparað. Gervijólatré var dregið fram og pakkar rötuðu þangað.

Helga Gísladóttir með nýlegan smálax sem tók heimagerða flugu. Ljósmynd/IO

Það er búin að vera hörkuveiði á stelpunum og í gærkvöldi var hópurinn búinn að skrá 57 laxa eftir þrjár veiðivaktir. Þær eru nú að klára í morgunsárið og ekki ólíklegt að hópurinn endi með einhverja sjötíu plús laxa.

Elín Ingólfsdóttir með hæng af Rangárflúðum sem féll fyrir Metallicu númer 16. Ljósmynd/IO

Ytri–Rangá hefur skilað mestri veiði allra laxveiðiáa í sumar og var síðast þegar Landssamband veiðifélaga birti vikutölur komin með rúmlega 1.400 laxa á land.

Jólajeppinn. Guðný Magnúsdóttir, Arna Guðlaug Einarsdóttir, Ásdís Jónsdóttir og Björg Jónsdóttir syngja jólalög. Leiðsögumaðurinn Sean Stanton skemmtir sér konunglega enda með skegg í ætt við jólasveininn. Ljósmynd/IO

Uppfært eftir að hollið lauk veiði

Samtals endaði hollið með 77 laxa sem verður að teljast fínasta veiði á tveimur dögum. Þá er magnað að segja frá því að allar 37 konurnar lönduðu laxi og samtals voru tveir maríulaxar í hollinu. Þar af kom annar þeirra á síðustu mínútu veiðitímans. Verður ekki annað sagt en Harpa og IO hafi staðið einkar vel að þessari skipulagninu og það er frábært að allar fengu lax.

• Blogga um frétt

Seinustu hundraðkallar sumarsins