Enn kemur höfðingi úr Hnausastreng

Einn þekktasti stórlaxastaður á landinu stóð undir nafni í dag. Hnausastrengur í Vatnsdalsá hefur geymt marga höfðingja í gegnum árin og einn slíkur kom á land í dag. Stefanía Guðmundsdóttir sem kölluð er Stella mætti til veiði í Vatnsdalsá á seinni vaktina í dag. „Þetta var alveg magnað. Ég setti saman og ákvað að setja undir Black Ghost einkrækju og ég var komin niður í miðjan Hnausa þegar þessi líka fiskurinn tók. Þetta var algert tröll,“ sagði Stella í samtali við Sporðaköst.

Viðureignin var snörp og metur Stella að hún hafi verið um tuttugu mínútur með fiskinn. Eftir að búið var að háfa fiskinn áttuðu menn og konur sig á því hversu stór fiskur var þarna á ferðinni. Stella segir að Þorsteinn Geirsson hafi mælt fiskinn og staðfest lengdina 107 sentímetrar. Þetta er stærsti lax sem Vatnsdalsá hefur gefið í sumar og þriðji stærsti laxinn sem fengist hefur til þessa í sumar.

Stærsti lax sem Stella hafði fengið fram til þessa var 85 sentímetra fiskur sem hún veiddi í Rofabakka, en það er vel þekktur veiðistaður í einmitt Vatnsdalsá.

Það er athyglisvert að þetta er annar hundraðkallinn í sumar sem tekur Black Ghost einkrækju. Sá fyrri var á Tannastöðum í Soginu og mældist hann 118 sentímetrar, eins og greint var frá í Sporðaköstum.

Sporðaköst óska Stellu til hamingju með laxinn.

• Blogga um frétt

Seinustu hundraðkallar sumarsins