Eldislax 20% af löxum í Hrútafjarðará

Norsku rekkafararnir skutluðu 24 laxa í Hrútafjarðará í dag. Fleiri voru særðir. Þetta þýðir að samtals hafa 38 eldislaxar veiðst í ánni síðsumars. Stofnstærð laxins í ánni í ár er metin um tvö hundruð fiskar. Kafararnir halda áfram í Hrútafjarðará á morgun þar sem vitað er um fleiri eldislaxa.

Áhættumat vegna eldis í sjókvíum er fjögur prósent af stofnstærð. Þar er miðað við mögulega strokulaxa sem ganga í einstaka á. Í Hrútafjarðará var því marki náð með átta löxum. Þeir eru hins vegar að verða um tuttugu prósent miðað við áætlaða stofnstærð í ár.

Einn af eldislöxunum. Sárin og sveppasýkingin á hausnum á honum er eftir lús sem er vaxandi vandamál í sjókvíaeldi. Ljósmynd/Aðsend

Rekkafararnir ráku upp stór augu þegar þeir komu í veiðistaðinn Stokk. Þar náðu þeir sautján eldislöxum og telja sig hafa hreinsað upp eldislaxinn í þeim stað. Vitað er um laxa í veiðistaðnum Surti og verður hann skoðaður á morgun.

Eftir því sem Sporðaköst komast næst er bændum og landeigendum mjög brugðið við þessi tíðindi en ljóst er að ef ekkert hefði verið að gert hefði innblöndun í stofn Hrútafjarðarár orðið gríðarleg. Stutt er í hrygningu hjá laxi í Hrútunni og það kom mönnum óþægilega á óvart að í nokkrum hyljum fannst stakur eldislax með þremur til fjórum villtum löxum.

Þeir fundu líka laxa á stangli innan um villta laxinn. Síká geymdi líka eldislaxa en hún er hluti af vatnasvæði Hrútafjarðarár. Ljósmynd/Aðsend

Veiði í Hrútafjarðará í sumar var 186 laxar og er það mjög lélegt ár.

Áhættumat vegna eldis í sjókvíum er sprungið þegar horft er til Hrútafjarðarár, Blöndu og Laxá á Refasveit. Í Blöndu hafa drepnir 53 eldislaxar og 17 í Laxá á Refasveit. Ljóst er að ef bjarga á villta íslenska laxastofninum sem er einstakur í heiminum þarf að grípa til aðgerða strax.

• Blogga um frétt

Seinustu hundraðkallar sumarsins