Veiði | mbl | 23.11.2023 | 8:39

Betri rjúpnavertíð en í fyrra

Rjúpnaspor. Hjarta veiðimanna tekur oft kipp þegar þeir ganga fram á nýleg spor. Einu sporin sem veiðimenn sjá í snjó á þessum tíma árs, eru spor eftir rjúpu, mýs, ref og stöku snjótittling. Ljósmynd/Eggert Skúlason

Miðað við frumniðurstöður í könnun sem SKOTVÍS stóð fyrir meðal veiðimanna er útlit fyrir að veiði á rjúpu í ár hafi verið fimmtán til tuttugu prósent meiri en í fyrra. Er það í fullu samræmi við aukna stærð veiðistofnsins árið áður, að sögn Áka Ármanns Jónssonar, formanns SKOTVÍS.

„Við erum að skoða niðurstöður úr þessari könnun sem stendur enn yfir. Veiðin virðist vera svipuð eftir landshlutum og í fyrra en kannski ívið meiri á NV landi. Sóknardagar eru um fjórir á veiðimann sem hefur verið raunin frá árinu 2005, þegar sölubann á rjúpu tók gildi. Fjöldi leyfilegra veiðidaga hefur hvorki aukið né dregið úr sókn, þrátt fyrir margvíslegar útgáfur af veiðitíma,“ upplýsti Áki um frekari niðurstöður í könnun félagsins.

Það vekur líka athygli að þeir sem nota hunda við veiðar fara að meðaltali einum degi oftar til veiða en veiða mjög svipað og aðrir.

Rjúpnaveiðitímabilið í ár var 25 dagar og hófst 20. október og síðasti veiðidagur var 20. nóvember, eða þriðjudagur í þessari viku. Vel viðraði stærstan hluta veiðitímans en það breytir ekki þeirri staðreynd að meðal veiðimaðurinn gengur til rjúpna fjóra daga á veiðitímabilinu.

Stök rjúpa í urð. Hún forðaði sér á flugi þegar ljósmyndari ætlaði sér að ná nærmynd af henni. Ljósmynd/Eggert Skúlason

Sporðaköst heyrðu frá mörgum veiðimönnum að þeir hefðu séð töluvert meira af fugli en síðustu ár og þá einkum fyrri hluta veiðitímabilsins. Margir voru komnir með nóg fyrir sig og sína þegar tímabilið var hálfnað.

Skotveiðifélag Íslands, SKOTVÍS hefur staðið í stafni í hagsmunabaráttu fyrir veiðimenn síðustu árinu. Í könnuninni sem vitnað er til hér í fréttinni var einnig mæld afstaða veiðimanna til félagsins hvort sem þeir voru félagsmenn eða ekki. Miðað við þau svör sem hafa borist er óhætt að segja að veiðimenn meta þessa hagsmunabaráttu félagsins mikils og stendur meðal einkunn félagsins í 8,7 í könnuninni þegar síðast fréttist. Veiðimenn voru beðnir um að meta frammistöðu félagsins á skalanum 1 til 10.

Rétt er að hvetja veiðimenn til að taka þátt í könnuninni en hægt er að nálgast hana meðal annars á facebooksíðu SKOTVÍS.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.