Blóðrauðar veiðitölur frá Noregi

Nýliðið sumar er það lélegasta sem menn hafa séð í Noregi með tilliti til laxveiða. Rétt rúmlega 77 þúsund laxar veiddust í norsku ánum og langflestar árnar eru undir tíu ára meðaltalinu þegar kemur að stangveiði. Margar voru langt undir því. Forsvarsmenn í norska stangveiðiheiminum tala sjálfir um blóðrauðar tölur þegar horft er á tölfræðina eftir sumarið.

Á sama tíma gerist það í fyrsta skipti að veiði á hnúðlaxi í fjörðum og á ósasvæðum Noregs var mun meiri en veiði á villtum laxi. Tölurnar yfir hnúðlaxinn eru ógnvekjandi.

Heimilt er að veiða lax í sjó við Noreg, þó að auknar takmarkanir hafi verið settar á þær veiðar hin síðustu ár. Ríflega 112 tonn af villtum laxi voru veidd í net og á stöng í sjó við Noreg í sumar. Þegar kemur að hnúðlaxi var aflinn hins vegar 183 tonn. Til samanburðar  veiddust tæp 215 tonn í sjó, af villtum laxi árið 2020. 

Síðasta hnúðlaxaár var 2021. Þá nam veiðin tæplega 72 tonnum í sjó, en rauk í sumar upp í 183 tonn. Í Finnmörku sem er nyrsta fylki Noregs voru settar niður gildrur neðarlega í flestar ár til að fanga hnúðlax og úr þessum gildrum voru teknir 244 þúsund hnúðlaxar. Flestar laxveiðiár í fylkinu áttu lélegt sumar og mörgum var hreinlega lokað fyrr en til stóð.

58 punda lax úr Alta-ánni í Noregi. Alta var töluvert undir meðaltalsveiði síðustu tíu ára. Sumarið 2023 var mikið hnúðlaxaár í Noregi og í fyrsta skipti veiddist mun meira af honum en Atlantshaflaxi í sjó við Noreg. Alta river

Veiðum á laxi er stjórnað með allt öðrum hætti í Noregi samanborið við Ísland. Veiði á laxi í sjó við Ísland heyrir sögunni til. Í Noregi má hins vegar sjá dæmi sem eru hreint út sagt ótrúleg í ljósi stöðunnar. Gott dæmi um þetta er áin Namsen á samnefndu svæði. Í net og á stöng í sjó úti fyrir Namsen veiddust í sumar 8.159 laxar. Stangveiði á vatnasvæði Namsen nam hins vegar 3.146 löxum. Meðaltalsveiði á vatnasvæðinu síðustu tíu ár er 6.525 laxar. Þannig að veiðin í sumar á stöng er tæp 52% undir meðaltalinu.

En það á við um flestar ár í Noregi að þær eru langt undir meðaltali. Hér eru nokkur dæmi og efstar eru þær þekktustu:

Veiðisvæði        Fjöldi laxa í sumar       Meðaltal síðasta áratug

Orkla                        3.545                           4.438

Gaula                       3.829                           4.499

Alta                          2.211                           2.746

Sandfjordelva              268                              502

Stjödalselva              1.590                           2.220

Kongsfjordelva             683                           1.125

Ogna                          707                            1.449

Bjerkreimselva          2.366                           3.371

Vestre-Jakobselv          517                           2.848

Repparfjord              2.920                           2.772

Síðustu tvær árnar eru þó til marks um að ástandið er misjafnt. Vestre-Jakobselv er þannig vart svipur hjá sjón á meðan að Repparfjord skilar betri veiði en meðaltalið. Samtals voru birtar tölur úr hundrað norskum laxveiðiám á heimasíðu Laksefiske.no. Af þeim voru aðeins fjórtán ár sem gáfu betri veiði en meðaltal síðasta áratugar. Aðrar ár, eða 86% voru undir meðaltali og þar af voru 61 meira en tuttugu prósent undir meðaltalinu. Nítján norskar ár í þessari úttekt náðu ekki 50% af meðaltalsveiði síðustu tíu ára.

Frá ánni Lakselva í Noregi. Íslendingar hafa verið tíðir gestir þar. Sumarið sem leið var hins vegar erfitt þar en mikið magn af hnúðlaxi náðist í gildrur neðst í ánni. Veiðin var töluvert undir meðaltalinu. Ljósmynd/Nils Folmer

Þetta er dökkt útlit og Norðmenn hafa vart séð það svartara á þessu sviði. Jákvæðust er þó staðan í fylkjunum Agder og Östlandet. Í þeim fylkjum hafa veiðar í sjó verið aflagðar og samkvæmt fréttum frá Noregi þá er fiskeldi ekki stundað á þeim svæðum sem villti laxinn gengur um og þar af leiðandi minni hætta á að laxalús herji á laxinn. Þessi fylki eru syðst í Noregi. 

Veiðisumarið á Íslandi var á svipuðum nótum þegar horft er á tölfræðina. Sumarið 2023 er næst lélegasta veiðisumar frá árinu 1974. 

• Blogga um frétt

Seinustu hundraðkallar sumarsins