Einn af helstu aðdáendum Grímsár í fjölmarga áratugi kvaddi drottninguna sína í sumar sem leið. Þetta er Birgir Gunnlaugsson tónlistarmaður sem haldinn er ólæknandi og banvænum sjúkdómi sem nefnist á leikmannamáli steinlunga eða IPF á fræðimálinu. Viðtal við Birgi birtist í nýútkomnu Sportveiðiblaði. Þar ræðir hann á opinskáan hátt um sjúkdóminn, ævi sína, tónlistarferilinn og eys úr viskubrunni sínum um Grímsá.
Gunnar Bender ritstjóri Sportveiðiblaðsins tók upp þátt með Birgi í sumar þar sem hann kvaddi Grímsána sína og vakti sá þáttur verðskuldaða athygli. Birgir fór raunar í tvær einskonar kveðjuveiðiferðir síðastliðið sumar. Bæði í Grímsá, eins og fyrr segir og líka vestur í Langadalsá þar sem hann hefur einnig veitt í fjölmörg ár. Báðar þessar ár kvöddu sinn mann með laxi.
Jólablað Sportveiðiblaðsins er að venju stútfullt af efni og kennir þar margra grasa. Meðal annars ræðir Finnur Harðarson Stóru–Laxár foringi um haustgöngur í Stóru og þá gagnrýni sem fram kom á októberveiði í leit að eldislaxi. Finnur er bæði leigutaki og landeigandi í Hreppunum og þannig allt um lykjandi.
Farið er með ungum konum á hreindýraveiði. Þær kalla sig Simlurnar og er það nafnið á veiðifélaginu sem þær eru í. Simlurnar leggja stund á hvers kyns skotveiði.
Þá má nefna að farið er í rjúpnaleiðangur með standandi fuglahundi í Þingeyjarsveit, skotveiði í Skotlandi og víðar.
Athygli vekur grein eftir þann mikla Aðaldalshöfðingja Pétur Steingrímsson í Nesi þar sem hann segir frá nýrri flugu sem hann hefur verið að fást við og ber nafnið Metallica Blue Dun. Í aðdraganda að því umræðuefni talar Pétur um að ofveiði sé ein ástæðan fyrir lélegri veiði í Laxá.
Gunnar Bender ritstjóri er á fullu að dreifa þessu þriðja tölublaði 41. árgangs. Hann stakk inn nefi á ritstjórnarskrifstofu Sporðakasta afhenti blað og sagði svo; „Nú mega jólin koma,“ og skellti upp úr með sínum vel þekkta hlátri.
Lengd á laxi | Veiðisvæði | Veiðimaður | Dagsetning Dags. |
---|---|---|---|
100 cm | Mýrarkvísl | Tim Racie | 23. júlí 23.7. |
102 cm | Víðidalsá | Ragnheiður Þengilsdóttir | 14. júlí 14.7. |
106 cm | Laxá í Aðaldal | Kristrún Ólöf Sigurðardóttir | 8. júlí 8.7. |
100 cm | Blanda | Patrick Devennie | 20. júní 20.6. |
100 cm | Kjarrá | Sigurður Smári Gylfason | 19. júní 19.6. |
Veiðiárið 2023: | |||
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |