Veiði | mbl | 18.2.2024 | 9:21

„Listasýning sjaldséðra verka“

Klinkhammer sem Örn Hjálmarsson hnýtti. Fallegt handbragð og silungurinn á erfitt með að standast þessa. Ljósmynd/Örn Hjálmarsson

Það fer að síga á seinni hlutann í Febrúarflugum, sem er stærsti fluguhnýtingaviðburður á Íslandi. Allir geta tekið þátt og þurfa bara að senda inn mynd af flugu sem þeir hafa hnýtt í tilefni verkefnisins. FOS.is stendur fyrir Febrúarflugum og þar er Kristján Friðriksson allsráðandi. Allir þátttakendur fara í pott og eru dregnir út nokkrir heppnir hnýtarar í lok mánaðar. Um er að ræða happdrætti en ekki keppni, eins og Kristján hefur lagt ríka áherslu á. Sporðaköst birta á sunnudögum myndir af nokkrum af þeim flugum sem hafa borist og vel Kristján myndirnar. Gefum honum orðið.

„Skammturinn að þessu sinni gæti verið í þemanu Listasýning sjaldséðra verka. Flugur og handbragð sem koma að öllu jöfnu ekki oft fyrir almennings sjónir, en njóta sín og fá athygli í Febrúarflugum.

Þessi gripur heitir mikla nafni Articulated monster bugger. Þessi fluga fer ekki framhjá neinum fiski þegar henni er kastað. Ljósmyndari/Sigurður Kristjánsson

En það má ekki gleyma nýjum meðlimum Febrúarflugna, þeim fjölgar enn og eru orðnir vel yfir 1600. FOS grunar að margir þeirra séu að hnýta, jafnvel að stíga sín fyrstu skref og til að lokka þá undan bakkanum og út í iðuna var ákveðið að egna fyrir þá með sérstökum viðurkenningum fyrir þátttökuna. Ekki stóð á stuðningi við þessa hugmynd og þrír nýir styrktaraðilar brugðust við og standa að baki þeim viðurkenningum; Reiða öndin, Valdemarsson fly fishing og Veiðivinir Fish Partner.“

Urriðabani eftir Stefán Bjarna Hjaltested. Þessi gæti hæglega staðið undir nafni. Ljósmynd/Stefán B. Hjaltested

Kristján tók saman tölfræði yfir þátttökuna í ár:

Enn fjölgar þátttakendum, eru orðnir vel yfir 1600 og margir þeirra brugðið á leik, þó sumir virðist halda aðeins í sér.
130 hnýtarar hafa lagt sitt að mörkum það sem af er og ekkert lát á viðbrögðum við innleggjum þeirra; 20.500 komment, broskarlar og þumlar á lofti og engin skortur á uppbyggilegum og góðum ábendingum.
Fjöldi flugna eru kominn hátt í 700, ótrúleg gróska og flottar flugur.

Ein af mörgum vel heppnuðum hönnunum Nils Folmers. Þetta er Ketill Máni. Fluga sem hefur oft gert það gott í laxi. Ljósmynd/Nils Folmer Jorgensen

Ingvar Ingvarsson sendi þessa inn. Falleg fluga og maður finnur fyrir vorinu sem hún boðar. Svangir silungar munu skoða þessa. Ljósmynd/Ingvar Ingvarsson

Dominik Drazba með flugu sem er eftirlíking af seiði eða smáfiski. Ránfiskar, eins og til dæmis ísaldarurriðinn í Þingvallavatni gætu fallið fyrir þessari. Ljósmynd/Dominik Drazba

Lunch money eftir Brand Brandsson. Flottur gripur. Sjóbirtingur eða urriði? Eða bæði? Ljósmynd/Brandur Brandsson

Stórar einkrækjur í svona viðhafnarbúningi eru svo magnaðar. Þetta er Mitchell eftir Bjarka Má Jóhannsson. Sannkallað listaverk. Ljósmynd/Bjarki Már Jóhannsson

Iða, ofurlítið bústin, eftir Benedikt Halldórsson. Getur gert gæfumuninn. Ljósmynd/Benedikt Halldórsson

Cascade eftir Ásgeir Þór Kristinsson. Öflug samsetning fyrir lax og mætti reyna hana meira á Íslandi. Ein af þeim sterkari í Rússlandi. Ljósmynd/Ásgeir Þór Kristinsson

Caddis Olvers Edvards. Caddisflugur eru eftirlæti stórra urriða. Þær eru stærstu flugur sem klekjast út í íslenskum ám og því sterkur leikur fyrir alla urriðaveiðimenn. Ljósmynd/Ásgeir Steingrímsson

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.