Veiðifélög í Vopnafirði vilja netin burt

Veiðifélög í Vopnafirði hafa enn og aftur krafist þess að netaveiði í sjó í námunda við laxveiðiár á svæðinu verði hætt. Þetta eru veiðifélög Hofsár, Sunnudalsár, Selár og Vesturdalsár. Erindinu hefur verið beint til sveitarfélagsins sem jafnframt veitir leyfi til netalagna. Byggja þessar netalagnir á gömlum lagaákvæðum og hafa verið stundaðar um langa hríð.

Netin eru lögð til að veiða silung. Almennt ákvæði er í lögum að óheimilt sé að veiða göngusilung í sjó nema þegar um er að ræða sjávarjarðir. Nú er hins vegar svo komið í Vopnafirði og raunar víða um land að bleikja er á miklu undanhaldi. Þannig segja talningar í ám á svæðinu að bleikjustofnar hafi hnignað stórlega og séu nú um tíundi hluti þess sem var í lok síðustu aldar. Sú staða hefur leitt til þess að vísindamenn Hafrannsóknastofnunar hafa hvatt til varúðar. Í sama streng hefur Fiskistofa tekið. Sú varúð felst fyrst og fremst í því að draga stórlega úr netaveiði eða hætta henni með öllu.

Bréfasendingar hafa verið í gangi milli sveitarfélagsins og veiðifélaganna þar sem þeir síðarnefndu benda á að lögin kveði á um eftirlit með veiðunum, skráningu afla og að virt séu lög sem gilda um netaveiðar. Það er meining veiðifélaganna að lítið sem ekkert eftirlit hafi verið með þessum veiðiskap.

Sveitarfélagið hefur kallað eftir áliti lögmanns vegna þessa en málið verður tekið fyrir á fundi sveitarstjórnar á morgun. Fyrir þeim fundi liggja tillögur um reglur um netaveiði frá sjávarjörðum í landi sveitarfélagsins. Miða þær að því að einungis eitt net verði leyft á hvern leyfishafa og skylt verði að skrá afla og skila skýrslum þar að lútandi. „Við erum hér fyrst og fremst að bregðast við þeirri stöðu sem Hafrannsóknastofnun og Fiskistofa hafa bent á varðandi alvarlega stöðu bleikjunnar,“ sagði Valdimar O. Hermannsson, verkefnastjóri sveitastjórnar Vopnafjarðarhrepps. Tillögurnar sem liggja fyrir fundi sveitarstjórnar á morgun bera heitið; Reglur um netaveiði í sjó í landi Vopnafjarðarhrepps.

Bleikjan á mjög undir högg að sækja um land allt. Í Vopnafirði er talið að stofninn sé nú ekki nema tíundi hluti þess sem var í lok síðustu aldar. Vísindamenn hafa hvatt til varúðar þegar kemur að bleikjunni. Golli / Kjartan Þorbjörnsson

Fyrrnefnd veiðifélög hafa greint sveitarfélaginu frá því að þau ætli að stórefla eftirlit með netaveiðunum. Bæði hvað varðar skráningu og aðra þætti. Þá hafa sömu félög einnig sett fram þá hugmynd að leigja veiðiréttinn af sveitarfélaginu og þar með að losna við netin.

Hér takast á tvenn gerólík sjónarmið. Annars vegar gamli tíminn þegar netalagnir voru heimilar til að draga björg í bú og þarf að fara allt aftur til ársins 1957 þegar þessi mál voru til umræðu áður en lög um lax og silungsveiði tóku gildi.

Svo er það hitt sjónarmiðið að ræktunarstarf í þeim laxveiðiám sem tengjast málinu hefur verið umfangsmikið og lagt í margháttaðar rannsóknir. Veiðimenn sem koma í árnar í Vopnafirði þurfa að sætta sig við strangar reglur, bæði hvað varðar veiðibúnað og veiðitími hefur verið styttur.

Vopnafjarðarhreppur er alls ekki eina sveitarfélagið sem er í þessum sporum að leyfa netaveiði á göngusilungi við sjávarjarðir byggt á gamalli hefð. Þetta sama mál hefur komið upp á Húsavík í nágrenni Laxár í Aðaldal, og dæmin eru fleiri.

• Blogga um frétt

Seinustu hundraðkallar sumarsins