Helmingi færri laxar en um aldamótin

Ráðstefna Six Rivers Iceland, um stöðu Atlantshafslaxins og rannsóknir sem standa yfir hófst á Vopnafirði í morgun. Ráðstefnan er vel sótt þangað var boðið nokkrum af helstu sérfræðingum á alþjóðlega vísu um Atlantshafslaxinn. Áhugamenn og heimamenn hafa einnig mætt og er talið að um áttatíu manns hafi mætt í morgun.

Staða laxins er ekki bara alvarleg. Hún er grafalvarleg, eins og kom glögglega fram í máli doktor Rasmus Lauridsen sem er vísindamaður staðsettur á Vopnafirði og sinnir rannsóknum fyrir SRI. Hann benti á að heildarstofn Atlantshaflaxins væri í dag um helmingur af því sem hann var um síðustu aldamót. Á níunda áratug síðustu aldar hafi ríflega sex milljónir laxa verið í Atlantshafi á fæðuslóð frá hinum ýmsu löndum, einkum í Evrópu. Í dag er þessi tala áætluð ríflega tvær milljónir einstaklinga. Síðustu tvo áratugina hefur stofninn minnkað um helming.

Ráðstefnan er vel sótt en þetta er í fyrsta skipti sem hún er haldin á Vopnafirði. Fram til þessa hafa þær verið í Reykjavík en nú hefur verið ákveðið að annað hvert ár verði hún fyrir austan. Ljósmynd/Einar Falur

Á sama tíma hefur veiði í sjó snarminnkað og er nú ekki nema brot af því sem var þegar hún var mest stunduð.

Fjölmörg áhugaverð erindi er á dagskrá á ráðstefnunni, bæði frá íslenskum vísindamönnum, en einnig frá öðrum löndum og umfjöllunarefnin eru margvísleg þó að öll tengist þau Atlantshafslaxinum og afkomu hans með beinum hætti.

Laxalús, hnúðlax, áhrif af sjókvíalaxi, endurheimt og bæting og fjölgun búsvæða er meðal þess sem er á dagskrá í dag.

Popparinn, ástríðuveiðimaðurinn og verndarsinninn Pálmi Gunnarsson var sérstakur heiðursgestur á ráðstefnunni. Teikningin fyrir aftan hann segir í raun allt. Ljósmynd/Einar Falur

„Ráðstefn­an, sem er sú fjórða í röðinni og hef­ur til þessa verið hald­in í Reykja­vík, fer nú í fyrsta sinn fram á Vopnafirði. Verður þar fjallað um vernd­araðgerðir á Íslandi í alþjóðlegu ljósi.

Á ráðstefn­unni koma sam­an all­ir helstu hagaðilar, bæði heima­menn og aðrir inn­an­lands auk fremstu laxa­sér­fræðinga frá Íslandi, Nor­egi og Bretlandi. Fjallað verður um hnign­un laxa­stofns­ins hvarvetna við Norður-Atlants­haf, en stærð stofns­ins er kom­in niður í fjórðung af því sem var á átt­unda ára­tugn­um.

Horft verður til aðgerða Six Ri­vers Ice­land til að vernda og styðja við af­komu lax­ins hér í ljósi þess­ar­ar alþjóðlegu hnign­un­ar og nýrra þátta sem ógna af­komu stofns­ins – með áherslu á fyr­ir­liggj­andi verk­efni um að bjarga lax­in­um frá brún út­rým­ing­ar,“ sagði í kynningu á SRI ráðstefnunni og eins og nefnt er þarna er laxinn á brúninni í stóra samhenginu. Vissulega eru einstök lönd eins og Ísland betur stödd en nágrannar okkar en línuritin eru á niðurleið sama hvaða þættir máls eru skoðaðir.

Fundargestir voru áhugasamir og drukku í sig fróðleikinn. Ráðstefnunni lýkur síðar í dag. Ljósmynd/Einar Falur

Við munum gera betur grein fyrir þeim rannsóknum sem kynntar eru á ráðstefnunni og hvaða leiðir vísindamenn sjá til að sporna við fæti. – Ef það er ekki orðið of seint.

• Blogga um frétt

Seinustu hundraðkallar sumarsins