Enn eru að veiðast eldislaxar

Afar líklegur eldislax veiddist í Fljótaá í Fljótum í dag. Vigfús Orrason var að veiða í ánni og fyrst og fremst að leita að bleikju. Í Berghyl, sem er einn af þekktari veiðistöðum í Fljótaá kastaði hann þeirri gjöfulu silungaflugu Squirmy Wormy. Stór fiskur tók ormalíkinguna og sá Vigfús tökuna.

Eftir mjög stutta baráttu sem hann áætlar að hafi ekki staðið nema í fimm mínútur landaði hann 78 sentímetra laxi. Grunsemdir vöknuðu strax hjá Vigfúsi enda afar reyndur veiðimaður. Við nánari skoðum má sjá að bakuggi er illa farinn og fiskurinn er hauslítill og minnir um flest á eldislaxana sem óðu um allt í haust sem leið, ættaðir frá Arctic Fish.

Bakugginn er eitt af mörgum útlitseinkennum sem kemur upp um eldislaxana. Þessi er dæmigerður fyrir eldislax. Ljósmynd/Vigfús Orrason

Laxinn verður frystur og því næst komið til Hafrannsóknastofnunar til rannsóknar. Aðspurður hvort hann héldi að fiskurinn hefði verið í ánni í vetur eða komið nýlega viðurkenndi Vigfús að hann væri ekki viss. „Fiskarnir sem við sáum í fyrra voru feitari, en hann er mjög hreisturlaus. Það verður forvitnilegt að heyra hvað Hafrannsóknastofnun segir,“ svaraði Vigfús.

Frétt af mbl.is

Eldislax veiðst á tveimur stöðum í vor

Hauslítill eins og þessir fiskar eru gjarnan. Vigfús er ekki viss hvort þetta er fiskur sem mætti nýlega eða hefur verið í ánni í vetur. Rannsókn mun leiða það í ljós. Ljósmynd/Vigfús Orrason

Þetta er þriðji meinti eldislaxinn sem veiðist í vor. Hafrannsóknastofnun hefur beðið veiðimenn um að vera vakandi fyrir þessum óboðnu gestum og eins og dæmin sýna er ekki vanþörf á. 

Talið er að 3,500 laxar hafi sloppið úr eldiskví Arctic Fish síðasta haust. Tæplega fimm hundruð hafa veiðst í laxveiðiám. Þá vantar ríflega þrjú þúsund fiska. Eitthvað af þeim getur hafa drepist en fyrir því eru engar sannanir.

• Blogga um frétt

Seinustu hundraðkallar sumarsins