Fjórir laxar á fyrstu vakt í Þverá

Veiði hófst í Þverá í Borgarfirði í morgun. Opnunin í Þverá er alltaf spennandi dagur. Norðurá hefur farið ágætlega af stað og nokkuð er liðið frá því að fyrsti laxinn sást í Klettsfljóti í Þverá.

Fjórir laxar veiddust í morgun. Þann fyrsta fékk Andrés Eyjólfsson yfirleiðsögumaður í Þverá. Fáir þekkja Þverá jafn vel og Andrés og fór vel á því að hann setti í og landaði fyrsta laxinum í sumar. Fiskurinn var fallegur stórlax sem mældist 87 sentímetrar og veiddist í Ármótakvörn.

Egill Ástráðsson, staðarhaldari í Þverá sagði nokkurn lit í ánni og sólina í essinu sínu. Hófstilltar vonir eru hjá veiðimönnum um seinni vaktina enda nokkur snjóbráð við þessar aðstæður.

Lúsugur smálax veiddist í Brennunni í morgun og snemmgenginn smálax er alltaf áhugaverð veiði. Brennan er ósasvæði Þverár þar sem hún mætir Hvítá. Hafi smálaxinn ekki verið einn á ferð gætu félagar hans glatt veiðimenn í Þverá í fyrramálið. Þá eru fjórar laxveiðiár formlega búnar að opna. Norðurá, Blanda, Urriðafoss og nú Þverá.

• Blogga um frétt

Seinustu hundraðkallar sumarsins