Veiði | mbl | 17.6.2024 | 20:49 | Uppfært 22:23

Mikið líf en afla mjög misskipt

Júlíus Jónsson með einn af opnunarfiskum í Grímsá í morgun. Ljósmynd: Jón Þór

Grímsá átti bestu opnunarvaktina í morgun af þeim ám sem voru að opna á sjálfum þjóðhátíðardeginum. Fimm laxar komu þar á land fyrir hádegi og fór þar fremstur í flokki kaupmaðurinn fyrrverandi Júlíus Jónsson. Júlli landaði tveimur löxum í Lækjarfossi og skaut yngri veiðimönnum ref fyrir rass. Hinir þrír komu úr Viðbjóði, og tveir úr Langadrætti. Sannarlega flottur morgun í Grímsá.

Jón Þór Júlíusson með nýrunninn lax frá því í morgun. Grímsá gaf fimm í morgun og einhverjir misstir. Ljósmynd/Hreggnasi

„Það var líf í morgun. Tveir landaðir og tveir misstir, fiskar að sýna sig og mjög lofandi. En upp úr 10 brast á með jökukaldri vestanátt og við sjáum ekki kvikindi. Það er eins og við séum í annari á,“ sagði Haraldur Eiríksson leigutaki Hítarár um opnunardaginn. Það var aldeilis góðmennt í ánni og fyrsta laxinum landaði Peter Landale stjórnarformaður Atlantic Salmon Trust á hitsaða einkrækju á Breiðinni. Undir kvöld kom svo þriðji laxinn á land. 80 sentímetra hrygna úr Breiðinni.

Peter Landale, stjórnarformaður AST með þann fyrsta úr Hítará 2024. Þrír veiddust þar á opnunardegi. Ljósmynd/Haraldur Eiríksson

Góð opnun í Leirársveit

Veitt er á fjórar stangir fyrstu dagana í Laxá í Leirársveit. Haukur Geir Garðarsson, leigutaki upplýsti að opnun hefði gengið vel.

„Nokkuð líflegt var og settum við í fjórtán laxa og náðum sex á land.

Lax kom úr Eyrafossi og sáust fleirri þar.

Hallfreður Vilhjálmsson landar 77 sm hrygnu úr Vaðstreng fyrir Vilhjálm Gíslason veiðifélaga sinn. Ljósmynd/VG

Þá kom lax úr Sunnefjufossi , Ljóninu, Vaðstreng og tveir úr Laxfossi.

Mjög stór lax sleit í Ljóninu eftir harða baráttu.

Lax var að gangi á síðdegisflóðinu og misstust tveir í Grettisstrengjum síðdegis.

Þetta voru allt vel haldnir 2ja ára laxar upp í 82sm. Sáum og misstum smálaxa þannig hann er líka mættur.

Fallegt vatn er í ánni og fiskurinn greinilega á hreyfingu.“

Björn K. Rúnarsson með fyrsta laxinn úr Laxá á Ásum 2024. 85 sentímetrar úr Dulsum. Ljósmynd/Sturla Birgisson

Ásarnir spennandi

Mikið líf var í Laxá á Ásum í dag. Margir misstir og víða sáust laxar. Björn K. Rúnarsson landaði þeim fyrsta úr Dulsum. 85 sentímetra fiskur. Fjórir laxar misstust þar í morgun. Við segjum ykkur nánar af Ása opnun á morgun.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Víðidalsá	Ragnheiður Þengilsdóttir	14. júlí 14.7.
106 cm	Laxá í Aðaldal	Kristrún Ólöf Sigurðardóttir	8. júlí 8.7.
100 cm	Blanda	Patrick Devennie	20. júní 20.6.
100 cm	Kjarrá	Sigurður Smári Gylfason	19. júní 19.6.
Veiðiárið 2023:
101 cm	Vatnsdalsá	Erlendur veiðimaður	29. september 29.9.
101 cm	Eystri-Rangá	Grzegorz Loszewski	27. september 27.9.
105 cm	Hvítá við Iðu	Katrín Tanja Davíðsdóttir	24. september 24.9.