Veiði | mbl | 18.6.2024 | 23:14

Víðidalsá á svipuðum nótum og nágrannar

Fyrsti laxinn í Víðidalnum kom á land í morgun. Stefán Kristjánsson fékk þennan í Kerinu. Ljósmynd/Magnús Stefánsson

Veiði hófst í Víðidalsá í morgun og má segja að opnun hafi verið á keimlíkum nótum og í ám í nágrenninu. Tveir laxar komu á land. Sá fyrsti veiddist í Kerinu í morgun og fékk Stefán Kristjánsson laxinn á litla Collie dog túbu. Mældist hann 84 sentímetrar. Annar lax veiddist skömmu fyrir hádegi í Efri-Kæli. Þar var að verki Friðjón Mar Sveinbjörnsson. Var það 75 sentímetra fiskur. Lítill tveggja ára.
með Friðjóni í för er doktor Marías sem veiddi fyrsta laxinn í fyrra í Víðidal. Hugsaði doktorinn sér gott til glóðarinnar að endurtaka leikinn. Það gekk þó ekki eftir að þessu sinni.
Nokkrir fiskar misstust og líf var á öllum svæðum en taka í fiski var dræm. Það er einmitt það sem fyrirsögn fréttarinnar vísar í. Svipuð staða hefur verið uppi í ánum í nágrenni Víðidals eins og Laxá á Ásum og í Miðfjarðará. Töluvert sést af fiski en verið tökutregur.
Fyrstu bleikjurnar veiddust á opnunardeginum og þykir það óvenju snemmt að sögn doktors Maríasar.
Á morgun opnar Langá og svo kemur að Vatnsdalnum og Stóru-Laxá.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Víðidalsá	Ragnheiður Þengilsdóttir	14. júlí 14.7.
106 cm	Laxá í Aðaldal	Kristrún Ólöf Sigurðardóttir	8. júlí 8.7.
100 cm	Blanda	Patrick Devennie	20. júní 20.6.
100 cm	Kjarrá	Sigurður Smári Gylfason	19. júní 19.6.
Veiðiárið 2023:
101 cm	Vatnsdalsá	Erlendur veiðimaður	29. september 29.9.
101 cm	Eystri-Rangá	Grzegorz Loszewski	27. september 27.9.
105 cm	Hvítá við Iðu	Katrín Tanja Davíðsdóttir	24. september 24.9.