Það hljóp heldur betur á snærið hjá trompetleikaranum og viðskiptafræðingnum Sigurði Smára Gylfasyni á fyrstu vakt í veiðitúrnum í Kjarrá í gær. Aðstæður þar efra eru krefjandi og áin vatnsmikil. Hollið gerði þó fína veiði og landaði alls níu löxum á fyrstu vaktinni.
Réttarhylur var vettvangur stóratburðar í gær. Trompetleikarinn valdi að setja fluguna Haug undir og átti það eftir að reynast heilladrjúg ákvörðun. Fljótlega tók stórlax og viðstaddir veiðifélagar supu hveljur þegar fiskurinn hreinsaði sig í miklu og tignarlegu stökki. Varð mönnum fljótlega ljóst að þarna væri á ferðinni einn af þessum allra stærstu.
Þórir Örn Ólafsson var einn af þeim sem fylgdust með viðureigninni og sagði hann að Sigurður Smári hefði ekki slegið feilnótu frekar en á trompetnum. Viðureignin var tímamæld og stóð í 22 spennandi mínútur.
þrjú vitni fylgdust með mælingunni á þessari glæsilegu hrygnu og stóð hún slétta hundrað sentímetra.
Svo stórar hrygnur eru sjaldgæfari en hængarnir. Þegar mælingu og fagnaðarópum var lokið átti að fara í myndatöku af dýrari gerðinni. Vildi þá ekki betur til en svo að hún slapp úr klóm feðraveldisins og því eru myndir ekki til af henni þar sem hrygnunni er haldið upp úr vatni fyrir myndavélina.
Lengd á laxi | Veiðisvæði | Veiðimaður | Dagsetning Dags. |
---|---|---|---|
102 cm | Víðidalsá | Ragnheiður Þengilsdóttir | 14. júlí 14.7. |
106 cm | Laxá í Aðaldal | Kristrún Ólöf Sigurðardóttir | 8. júlí 8.7. |
100 cm | Blanda | Patrick Devennie | 20. júní 20.6. |
100 cm | Kjarrá | Sigurður Smári Gylfason | 19. júní 19.6. |
Veiðiárið 2023: | |||
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |