Laxinn mættur óvenju snemma í Djúpið

Jákvæðar fréttir í laxveiðinni hafa verið margar og spennandi síðustu daga. Langadalsá í Ísafjarðardjúpi er ein af þeim ám þar sem sveiflur geta verið afskaplega miklar. Nú ber svo við að töluvert af laxi er kominn í hana og það mun fyrr en venjulega. Sextíu laxar eru gengnir í gegnum teljarann í henni.

Sigurður Már Einarsson fiskiræðingur ásamt fleirum hefur vaktað laxastofn árinnar meðal annars vegna mögulegra áhrifa slysasleppinga úr sjókvíaeldi á laxastofn Langadalsár. Settur var upp myndavélateljari af fullkomnustu gerð sem hefur verið í rekstri frá 2019.  Laxagöngur í byrjun tímabilsins 2024 eru mun meiri en sést hafa undanfarin ár. Talning hefur stundum gengið erfiðlega vegna tæknilegra erfiðleika og lax náð að stökkva framhjá teljaranum. Línuritið sem fylgir með fréttinni segir hins vegar ákveðna sögu.

„Ég hef ekki séð þetta gerast svona snemma þau ár sem ég hef fylgst með henni,“ upplýsir Sigurður Már.

Göngur í gegnum teljarann í Langadalsá. Línuritið nær til 12. júlí en sýnir áþreifanlega hversu fyrr laxinn er að mæta og í meira mæli. Línan fyrir 2024 er á flugi miðað við fyrri ár. Ljósmynd/Riverwatcher

Sú mynd sem fylgir hér með sýnir samanburð milli ára af laxagengd í gegnum teljarann í Langadalsá.

Sjá mátti þess stað strax í opnun að útlitið væri gott. Sex laxar veiddust og í dag eru komnir ellefu fiskar í bók. Mikil flóð hafa verið í ánni og hún kolmorauð síðustu daga. Sigurður Þorvaldsson hefur umsjón með ánni og sagði hann í morgun að teljarinn sýndi nú sextíu laxa en hann segir að vitað sé að nokkrir laxar voru þegar gengnir upp áður en teljarinn var settur niður í vor.

Teljarinn við Langadalsá við Ísafjarðardjúp. Þarna er gott vatn í ánni. Kristín Margrét

Svona leit Langadalsáin út í morgun og teljarinn og mannvirkið í kringum hann á kafi. Þegar sjatnar í henni gæti orðið fjör. Ljósmynd/SMÞ

Veiðin í Langadalsá var undir væntingum í fyrra en þá veiddust aðeins sextíu laxar. Það er langt undir meðaltali, hvort sem horft er til síðustu fimm ára (124 laxar) eða síðustu tíu ára (211 laxar). Hún á því eitthvað inni ef horft er til meðaltala. Síðasta ár var plagað af eldislaxastroki en töluvert gekk af þeim fiskum upp í árnar í Djúpinu.

Guðmundur H. Jónsson sleppir laxi í opnun í Langadalsá. Sextíu laxar eru nú staðfestir í gegnum teljarann. Ljósmynd/SMÞ

Hvannadalsá sem á ós með Laugardalsá er líka að upplifa jákvæða byrjun og þar er laxinn einnig mættur. Áhugavert verður að fylgjast með laxveiðiánum í Djúpinu í sumar en þessi byrjun er betri en menn hafa átt að venjast síðustu ár. Þorlákur Traustason sem manna best til Hvannadalsár, segir ljóst að fiskur sé mun fyrr á ferðinni fyrir vestan og telur að hann sé hálfum mánuði fyrr en í venjulegu árferði.

Samkvæmt rafrænu veiðibókinni, angling iQ eru komnir sautján laxar á land úr Laugardalsá í Ísafjarðardjúpi og veiddust þeir fyrstu 21. júní.

• Blogga um frétt

Seinustu hundraðkallar sumarsins