Veiði | mbl | 18.7.2024 | 18:12

Víða hörkuveiði og Borgarfjarðarsveifla

Richard Brown með fallegan smálax af Hlíðarfossbreiðu í Vesturá í Miðfirði, sem hann fékk á hitchtúbu í morgun. Brosið er breitt og ánægjan mikil. Miðfjörður skilaði 190 laxa viku og hefur veiðin þar verið miklu betri en í fyrra. Ljósmynd/Sporðaköst

Eftir fimm mögur ár virðist loksins komið að því að laxveiðimenn fái upplyftingu. Veiðin síðustu vikuna var virkilega góð og miklu betri en í fyrra. Þverá/Kjarrá ruddist upp í efsta sætið á listanum yfir aflahæstu veiðiárnar, með 318 laxa viku. Ef svo heldur fram sem horfir á þeim bænum fer hún yfir þúsund laxa í þessari viku.

Norðurá gaf aðeins eftir á því flugi sem hún hefur verið en þar er skýring á. Mögnuð úrkoma margfaldaði vatnsmagn Norðurár úr sex rúmmetrum í 198 á tveimur dögum. Þar duttu út nokkrir veiðidagar og mun hún sjálfasagt bæta það upp í komandi viku.

Miðfjarðará er í fjórða sæti og á ágætu flugi. Síðasta vika skilaði 190 laxa veiði og ljóst að hún skilur hinar húnvetnsku árnar eftir í rykmekki, eins og reyndar fyrri ár. Afar forvitnilegt verður að sjá hvað gerist í Miðfirðinum þegar dregur að næsta stórstreymi sem er þann 24.

Elliðaárnar skjótast upp um nokkur sæti enda laxagöngur þar með mesta móti. 129 laxa vika er að baki og stefnir í áframhaldandi góða veiði verði skilyrði hagfelld.

Langá, Grímsá, Kjósin og ekki síst Laxá í Leirársveit eru að njóta góðs af miklum smálaxagöngum, eins og sjá má á listanum hér að neðan. Sérstaklega er magnað að sjá aukninguna í Leirársveitinni, milli ára. Hún stóð í gærkvöldi í 260 löxum en þann 19. júlí í fyrra voru þeir 130. Það er tvöföldun á veiði frá síðasta sumri.

Stóra-Laxá og Laxá í Leirársveit hafa báðar gefið tvöfallt meiri veiði en í fyrra. Nú stefnir í afbragðs laxveiðiár, eftir fimm mögur ár. Ljósmynd Sporðaköst

Ásarnir eru dottnir í gang og þar er búin að vera jöfn og góð veiði síðustu daga eins og tölurnar sýna. Sömuleiðis eru Stóra–Laxá og Jökla að gefa betri veiði en á sama tíma í fyrra. Sérstaklega sú fyrr nefnda sem er á sama stað og Laxá í Leirársveit með tvöföldun á veiði milli ára.

Vopnafjörðurinn er að byrja töluvert en í fyrra miðað við tölur úr Selá og Hofsá, en þær eru báðar nokkur undir því sem veiðin var á sama tíma í fyrra.

Rangárnar eru að hressast og þá sérstaklega sú Ytri sem er með betri veiði en í fyrra en Eystri er enn aðeins undir tölum 2023.

Það stefnir í gott ár í laxveiðinni. Hversu gott það verður kemur fljótlega í ljós.

Að þessu sinni birtum við tuttugu efstu árnar. Nú er farið að færast fjör í leikinn og veiðin víðast hvar betri en á sama tíma í fyrra. Í nokkrum ám er hún mun betri. Fyrsti dálkurinn er talan í viðkomandi á í lok dags í gærkvöldi, 17. júlí. Dálkur tvö, veiðin í fyrra segir til um hver talan var í loks dags 19. júlí í fyrra. Síðasti dálkurinn er svo veiðin síðustu sjö daga, samkvæmt tölum frá angling.is sem er vefur Landssambands veiðifélaga.

Vatnasvæði Veiddir laxar Veiðin í fyrra Vikuveiðin

Þverá/Kjarrá 847 540 318

Norðurá 693 553 112

Urriðafoss* 608 420 117

Miðfjarðará 476 263 190

Ytri–Rangá 448 346 190

Elliðaár 323 278 129

Eystri–Rangá 308 351 109

Langá á Mýrum 304 215 115

Grímsá 284 154 130

Laxá í Kjós 265 163 108

Laxá í Leirársveit 260 130 80

Haffjarðará 256 357 61

Laxá á Ásum 245 178 110

Stóra–Laxá 236 118 80

Jökla 220 188 95

Selá í Vopnafirði 200 273 83

Víðidalsá 162 180 72

Vatnsdalsá 161 102 68

Laxá i Dölum 151 55 85

Flókadalsá 150 95 20

*Ekki skilað vikutölum. Tölur miðast við 10. júlí.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Víðidalsá	Ragnheiður Þengilsdóttir	14. júlí 14.7.
106 cm	Laxá í Aðaldal	Kristrún Ólöf Sigurðardóttir	8. júlí 8.7.
100 cm	Blanda	Patrick Devennie	20. júní 20.6.
100 cm	Kjarrá	Sigurður Smári Gylfason	19. júní 19.6.
Veiðiárið 2023:
101 cm	Vatnsdalsá	Erlendur veiðimaður	29. september 29.9.
101 cm	Eystri-Rangá	Grzegorz Loszewski	27. september 27.9.
105 cm	Hvítá við Iðu	Katrín Tanja Davíðsdóttir	24. september 24.9.