Veiði | mbl | 19.7.2024 | 18:13 | Uppfært 18:40

Slæmar fréttir og góðar – mjög góðar

Erlendur veiðimaður rekur upp gleðiöskur eftir að landa þessum nýgengna laxi. Hofsá er langt undir í veiðitölum samanborið við í fyrra. Það getur verið fljótt að breytast enda vatn verið með mesta móti þar eystra. Ljósmynd/SRI

Bæði slæmar og góðar fréttir má lesa út úr upplýsingum um laxveiðiárnar sem ekki eru í efstu sætunum á listanum yfir aflabrögð, sem angling.is birti í gær. Þannig blasa við miklar sveiflur í mörgum ám. Hér tökum við fyrir neðri hluta listans.

Byrjum á góðu fréttunum. Andakílsá er með miklu betri veiði en í fyrra. 128 laxar á móti 45 á sama tíma í fyrra. Þar kemur fram smálaxasveiflan sem Borgarfjörðurinn og Vesturlandið er að njóta í sumar. Svipaða stöðu má sjá í Haukadalsá, Straumunum, Brennunni, Skugga og raunar líka í Hrútafjarðará. Allt ár og svæði sem eru langt yfir veiðinni á sama tíma í fyrra. Allt þetta má lesa út úr listanum hér að neðan.

Mýrarkvíslin er komin í 38 laxa samkvæmt angling.is. Hún er ekta síðsumarsá og erfitt að meta stöðuna þar. Veiðin hefur verið góð síðustu daga. Ísak Matthíasson veiddi þennan í hyl 36 í kvíslinni. Ljósmynd/Matthías Þór Hákonarson

Það eru líka slæmar fréttir sem leynast innan um. Blanda átti lélegt ár í fyrra. Hún hefur skilað 72 löxum í sumar, en á sama tíma í fyrra var hún í 225 löxum. Ekki má afskrifa Blöndu því stóri straumurinn á miðvikudag getur breytt stöðunni. En byrjunin er áhyggjuefni.

Hafralónsá er spurningamerki. 35 laxar í sumar á móti 105 í fyrra. Nágrannar hennar, þær Sandá og Svalbarðsá eru á betra róli. Sandá reyndar enn undir í samanburði við 2023 en Svalbarðsá aðeins yfir.

Laxá í Aðaldal er á svipuðu róli og í fyrra þegar hún bætti sig verulega og virðist sem sú bæting staðfestist í ár. Það er samt enn frekar stutt liðið á sumarið þar á bæ og næsti straumur verður spennandi.

Laxi sleppt í Miðfjarðará í Bakkafirði. Veiðin þar er aðeins betri en í fyrra. Það getur þó verið fljótt að breytast í báðar áttir. Ljósmynd/SRI

Hofsá er töluvert undir miðað við 2023. Hins vegar berast góðar fréttir úr Vopnafirðinum og þær fréttir raungerast vonandi í veiðitölum innan skamms.

Hér er staðan í ánum sem ekki komust á topp tuttugu listann hjá okkur í gær.

Veiðitölurnar miðast við veiði að loknum veiðidegi 17. júlí. Dálkur tvö er veiði í þessum ám á sama tíma í fyrra. Raunar munar tveimur dögum því angling.is birtir alltaf tölur á fimmtudögum og það bar upp á 19. júlí í fyrra. Allar þessar ár eiga því tvo daga inni. Þriðji dálkurinn er svo fjöldi veiddra laxa vikuna 10. – 17. júlí.

Vatnasvæði Veiddir laxar 2023 Vikuveiðin

Hofsá í Vopnafirði 141 232 51

Laxá í Aðaldal 128 125 54

Andakílsá 128 47 53

Haukadalsá 125 91 49

Brennan 123 82 12

Skjálfandafljót 108 -- 14

Straumar 101 39 24

Hítará 96 134 23

Straumfjarðará 96 89 48

Miðfjarðará í Bakkaf. 82 77 50

Úlfarsá (Korpa) 76 69 26

Blanda 72 225 23

Leirvogsá 69 113 44

Svalbarðsá 69 74 53

Sandá í Þistilfirði 69 58 42

Skuggi 53 45 8

Hrútafjarðará 52 23 27

Miðá í Dölum 51 44 25

Hólsá Austurbakki* 40 25 --

Mýrarkvísl 38 -- 34

Hafralónsá 35 105 12

Gljúfurá í Borgarf. 33 35 8

Flekkudalsá 32 -- 23

Laugardalsá 23 -- 7

Fnjóská 12 -- 2

Fljótaá 7 -- 3

Svartá í Húnavatnss. 7 8 5

Þar með er tæmdur listinn sem angling.is birti í gær. Misjafnt er hvað er til af gögnum yfir þær ár sem neðarlega eru á listanum.

*Tölur frá 10. júlí og samanburðarárið er úr sömu viku.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Víðidalsá	Ragnheiður Þengilsdóttir	14. júlí 14.7.
106 cm	Laxá í Aðaldal	Kristrún Ólöf Sigurðardóttir	8. júlí 8.7.
100 cm	Blanda	Patrick Devennie	20. júní 20.6.
100 cm	Kjarrá	Sigurður Smári Gylfason	19. júní 19.6.
Veiðiárið 2023:
101 cm	Vatnsdalsá	Erlendur veiðimaður	29. september 29.9.
101 cm	Eystri-Rangá	Grzegorz Loszewski	27. september 27.9.
105 cm	Hvítá við Iðu	Katrín Tanja Davíðsdóttir	24. september 24.9.