Veiði | mbl | 23.7.2024 | 9:08

Miklar sveiflur og uppákomur í einvíginu

Óopinbera heimsmeistaraeinvígið í laxveiði er enn í fullum gangi og margvíslegar vendingar hafa átt sér stað síðustu misserin. Tóti tönn, Þórarinn Sigþórsson er sá maður í heiminum sem veitt hefur flesta Atlantshafslaxa eða 21.077. Þannig var staðan fyrir veiðitímabilið. Tóti er búinn að bæta nokkrum við í sumar.

Sá sem er að elta Tóta er Árni Baldursson sem hefur landað hátt í tuttugu þúsund löxum og telur sig vera um 1.500 löxum á eftir Tóta. Árni er ríflega tuttugu árum yngri en tannlæknirinn og telur sig eiga möguleika á að ná honum. Hann segist engu að síður verða hamingjusamur haldi Tóti titlinum.

Árni er mikill aðdáandi Tóta og segir hann mikla fyrirmynd fyrir sig og marga aðra veiðimenn.

Alls konar uppákomur hafa sett svip sinn á einvígið undanfarin misseri. Árni er fótbrotinn sem stendur og allar líkur á að hann missi af veiðitímabilinu. Tóti hefur líka átt við fótamein að stríða en er í dag í fínu formi, eftir því sem Sporðaköst komast næst. Það er því ljóst að þetta einvígi er enn í fullum gangi. Eins og Árni Baldursson orðaði það, „Ég er hérna enn og hann getur ekki bara hallað sér aftur og slakað á. Ég veiddi 170 laxa í fyrra og það er alveg möguleiki á að ég nái honum. Vissulega hefur veiðin minnkað og það meira að segja þó að maður sé að auka ástundun,“ hlær Árni.

Þó að þessum tölum sé haldið saman meira til gamans þá eru þeir félagar Árni og Tóti báðir miklir keppnismenn og þetta verður ekki útkljáð strax. Ferill þessara tveggja ótrúlegu veiðimanna hefur vakið athygli út fyrir landsteina og fleiri en einn blaðamaður hefur rætt þetta við Árna Baldursson.

Hann var gestur Dagmála Morgunblaðsins í gær og þar barst þetta óformlega einvígi þessara tveggja kappa til tals. Í myndbandinu sem fylgir fréttinni fer Árni Baldursson yfir stöðuna eins og hún blasir við honum.

Þátturinn í heild sinni er opinn fyrir áskrifendur Morgunblaðsins.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.