Góður stígandi í veiði um allt land

Þverá/Kjarrá er fyrsta ársvæðið sem fer yfir þúsund laxa i sumar. Norðurá er ekki langt undan og líklegt að hún komist í fjögurra stafa tölu á næstu dögum. Síðasta þriggja daga holl þar á bæ skilaði yfir hundrað löxum. Veiði í Borgarfjarðaránum er miklu betri en í fyrra og ljóst að lokatölur á svæðinu munu verða þær bestu í nokkur ár. Grímsá og Laxá í Dölum eru báðar með miklu meiri veiði en í fyrra. Grímsá nálægt tvöföldun en Dalirnir með þrefalt meiri veiði samanborið við 2023. Langá er einnig að sjá mun betra ár en í fyrra. 

Austurlandið er að hressast og bæði Hofsá og Selá hafa bætt hressilega við sig frá síðustu viku. Vikuveiðin í Selá var 234 laxar og er hún á flugi eftir fremur rólega byrjun. Smálaxagöngur virðast vera góðar í þessum landshluta.

Norðurlandið byrjaði mjög rólega eins og vill gerast þegar stórlaxinn er af skornum skammti. En þar eins og í öðrum landshlutum er góðar smálaxagöngur að gleðja veiðimenn og auka veiðina. Miðfjarðará er þar í fararbroddi með tvöföldun á veiði miðað við í fyrra. Hrútafjarðará er að eiga langþráð betra ár en sést hefur í nokkurn tíma. Veiðin þar er upp um hvorki meira né minna en 220 prósent, þó að hún komist ekki inn á listann yfir tuttugu hæstu árnar. Þá er Vatnsdalsá mun betri en í fyrra og sama má segja um Laxá á Ásum. Víðidalsá er rétt komin yfir veiði fyrra árs en Blanda er ekki að ná sér á strik.

Syðsti hluti landsins er einnig betri en í fyrra. Laxá í Leirársveit er með ríflega tvöföldun milli ára. Kjósin er líka að eiga betra ár og borgarperlan er í ágætu stuði. Ef við horfum til Suðurlandsins þá er ljóst að Finnur Harðarson getur brosað sínu breiðasta. Gott vatn er í Stóru Laxá og veiðin upp um 291 prósent milli ára. 

Annadora frá Danmörku með lúsugan 87 sentímetra hæng úr Ytri Rangá fyrr í mánuðinum. Ytri var með vikuveiði upp á ríflega 300 laxa. Þessi veiddist í Kvíslármótum. Ljósmynd/Dagur Árni Guðmundsson

Rangárnar eiga misjöfnu gengi að fagna. Eystri Rangá var með vikuveiði upp á 218 laxa. Hún er nokkuð undir í samanburði við 2023 en Ytri er með góðan og mikinn stíganda. Þannig skilaði hún mestri vikuveiði allra vatnasvæða í síðustu viku. Hvorki meira né minna en 328 löxum. Ljóst er að hún hirðir toppsæti listans fljótlega verði framhald þar á.

Að þessu sinni birtum við tuttugu efstu árnar. Nú er farið að færast fjör í leikinn og veiðin víðast hvar betri en á sama tíma í fyrra. Í nokkrum ám er hún mun betri. Fyrsti dálkurinn er talan í viðkomandi á í lok dags í gærkvöldi, 24. júlí. Dálkur tvö, veiðin í fyrra segir til um hver talan var í loks dags 26. júlí í fyrra. Þriðji dálkurinn er svo veiðin síðustu sjö daga, samkvæmt tölum frá angling.is sem er vefur Landssambands veiðifélaga. Fjórði og síðasti dálkurinn er viðbót og segir til um prósentubreytingu miðað við sömu dagsetningu 2023 þar sem þær upplýsingar eru fáanlegar. Aukningin eða samdrátturinn miðast við seinnipartinn í dag og því gæti verið ofurlítið ósamræmi milli talna gærdagsins og prósentuaukningu. 

Vatnasvæði        Veiddir laxar    Veiðin 2023    Vikuveiðin    Breyting í %

Þverá/Kjarrá          1049              668                  202           72%* 

Norðurá                 910               588                  217             58%  

Ytri–Rangá             776               618                  328              --

Miðfjarðará            721               409                  245             104%

Urriðafoss              668*             563                   --                --

Eystri–Rangá          526               583                  218              --

Langá á Mýrum       503               351                 199              55%

Elliðaár                   439               343                 116              33%

Selá í Vopnafirði      434                438                 234             12%

Laxá á Ásum           403                265                158               --

Grímsá                   391                 202                107              --

Laxá í Leirársveit     355                 145                 95               --

Laxá í Kjós              351                 189                 86              66%

Haffjarðará              348                 447                92               --

Jökla                       325                 325               105              15%

Hofsá                      286                 383                145            -14%

Stóra Laxá              274                 129                 38             291%

Laxá í Aðaldal          268                  229                140            21%

Víðidalsá                 263                  256                101             11%

Laxá i Dölum           244                    78                93                --

*Þverá er upp um 39% frá í fyrra en Kjarrá upp um 106%. Einhverra hluta vegna eru þessar tvær ár taldar saman á vef Landssambands veiðifélaga en sitt í hvoru lagi á angling iQ sem er eðlilegra þar sem þær eru seldar sitt í hvoru lagi.

**Ekki komnar nýjar tölur í Urriðafossi.

• Blogga um frétt

Seinustu hundraðkallar sumarsins