Fyrsti pönnukökulaxinn úr Ytri–Rangá

Sá skemmtilegi og þjóðlegi siður hefur orðið til í Ytri–Rangá að skella í pönnukökur þegar þúsundasti laxinn er veiddur. Pönnukökuilmur barst frá veiðihúsinu í gær og var það til heiðurs Danilo Assolari, veiðimanninum sem setti í landaði þúsundasta laxinum.

Fín veiði hefur verið í Ytri–Rangá. Þegar tölur voru birtar á vef Landssambands veiðifélaga síðastliðinn fimmtudag, sem tóku til fjölda laxa miðvikudagskvöldið 24. júlí var Ytri í 776 löxum. Klukkan 19 í gærkvöldi veiddist svo þessi lax sem kom ánni í fjögurra stafa tölu. 

Í fyrra var sá þúsundasti aðeins síðar á ferðinni eða 1. ágúst. Veiðin er því betri sem því nemur. 

Stefán Sigurðsson hjá IO sem rekur Ytri-Rangá, Anna María Kristjánsdóttir og Ári Árnason, framkvæmdastjóri veiðifélagsins. Pönnukökurnar hurfu eins og dögg fyrir sólu enda fátt betra þegar komið er í hús eftir góða vakt að fá eina volga pönsu. Ljósmynd/Alexander Freyr Þórisson

Anna María Kristjánsdóttir bakaði pönnukökurnar og gerir hún það betur en flestir, að sögn þeirra sem hafa notið þeirra.

Það er gaman að því að þegar svona siðir og uppákomur festa rætur. Sporðaköst þekkja bara eitt annað dæmi af þessu tagi en það er austan úr Hofsá þar sem Jóhann Gunnar Arnarsson, butlerinn hefur bakað girnilega tertu af sama tilefni.

Flugan sem gaf þúsundasta laxinn í Ytri-Rangá í gærkvöldi. Pétur leiðsögumaður valdi hana í fyrra og nú er hún einfaldlega kölluð Peters choice. Ljósmynd/IO

Flugan sem þúsundasti laxinn í Ytri tók í gær, er kölluð Peters Choice en þar er vitnað til þess að Pétur leiðsögumaður valdi fluguna fyrir Danilo og hefur hún reynst einkar fengsæl. Gaf til að mynda sex laxa í gær.

Lax númer tvö þúsund í Ytri–Rangá í fyrra veiddist 20. ágúst. Miðað við stöðuna núna þar sem veiðin er meiri þá má telja líklegt að hann veiðist 14. eða 15. ágúst. 

• Blogga um frétt

Seinustu hundraðkallar sumarsins