Mikil aukning í Andakíl, Hrútu og víðar

Það eru miklar sveiflur í veiðinni þegar horft er til minni vatnasvæða í laxveiðinni. Bæði má sjá mikla aukningu á veiði frá því í fyrra en einnig samdrátt. Mun fleiri ár eru þó að bæta við sig. Þá eru nokkrar ár að sýna mikla aukningu frá því í fyrra. Andakílsá, Haukadalsá, Flókadalsá, Hrútafjarðará og Mýrarkvísl eru allar með miklu betri veiði en síðasta sumar. 

Mýrarkvísl er komin í tvö hundruð laxa. Það er miklu meira en hún hefur verið að gefa á þessum tíma síðustu ár. Í fyrra var hún komin í níutíu laxa og svipuð var staðan sumarið 2022. Þetta gæti orðið besta ár í kvíslinni í nokkur ár. Hún er flokkuð sem síðsumarsá og framundan eru góðir dagar í henni.

Þó svo að vanti nýjustu tölurnar úr Andakílsá má vera ljóst að hún er að margfalda veiðina frá í fyrra. Hún er væntanlega í kringum þrjú hundruð laxa í dag. Var um miðjan ágúst í fyrra að nálgast hundrað laxa.

Víða er laxinn farinn að taka á sig haustlitinn. Enn eru þó einn og einn að mæta. Hængurinn hér að ofan er orðinn vígalegur. Ljósmynd/Ari Þórðarson

En það má líka sjá ár sem eru með mun lélegri veiði en í fyrra. Leirvogsá, Fnjóská og Affallið eru mikið niður miðað við sama tíma í fyrra. Leirvogsá er með þrjátíu prósent færri fiska en á sama tíma og í fyrra. Fnjóská er með hundrað laxa en var komin yfir tvö hundruð um miðjan ágúst síðasta sumar. Affallið er langt á eftir í samanburðinum.

Veiðitöl­urn­ar miðast við veiði að lokn­um veiðidegi 14. ágúst. Dálk­ur tvö er veiði í þess­um ám á sama tíma í fyrra. Raun­ar mun­ar tveim­ur dög­um því angling.is birt­ir alltaf töl­ur á fimmtu­dög­um og það bar upp á 16. ágúst í fyrra. All­ar þess­ar ár eiga því tvo daga inni. Þriðji dálk­ur­inn er svo fjöldi veiddra laxa vik­una 7. – 14. ágúst. Síðasti dálkurinn segir til um prósentubreytingu milli ára, þar sem sú tala er tiltæk.

Vatna­svæði         Veidd­ir lax­ar   2023       Vikan    Breyting %

Sval­b­arðsá                 308         223          32          --

Hauka­dalsá                281         183          20         54% 

Skjálf­andafljót            272          --            37          --

Sandá í Þistil­f­irði         272          218         37          31%

Blanda                       271          318         22         -21% 

Anda­kílsá *                265           91          --            --

Flókadalsá                  260          155         30           --

Hítará                        260          244         34           3%

Hrúta­fjarðará             255            73         48         270%

Miðfjarðará í Bakkaf.   247          146         38          46%

Hólsá Aust­ur­bakki       237          341         50          --

Straum­fjarðará           212          172         23          31%

Mýr­arkvísl                  200            90          36          --

Hafralónsá                  197          211         34         -8%

Brenn­an                     186          118          18         59%

Leir­vogsá                   171           236          28       -28%

Úlfarsá (Korpa)           134           105          18        41%

Straum­ar                   157            85           14         87%

Miðá í Döl­um              140            67            9        118%

Flekku­dalsá                120             --           22          --

Gljúf­urá í Borg­arf.       111            77           17          --

Fnjóská                       99            206          25          --

Skuggi                        76             64            2          --

Laug­ar­dalsá                 60             --           11           --

Svar­tá í Húna­vatnss.    52             59           3          8%

Fljótaá                        39              74          13       -47%

Affall                           35            131          14          --

Þverá í Fljótshlíð *        21             20          14           --

* Vantar nýjar tölur.

Þar með er tæmd­ur list­inn sem angling.is birti í gær. Mis­jafnt er hvað er til af gögn­um yfir þær ár sem eru neðarlega á list­an­um.

• Blogga um frétt

Seinustu hundraðkallar sumarsins