Veðurguðirnir virðast hafa gleymt Íslandi þegar kom að því að uppfæra vor í sumar. Vonin um sólríkt og hlýtt sumar varð að engu. Margir bölva þessu ástandi en þó má finna jákvæða hluti þrátt fyrir allt. Vatn í öllum laxveiðiám hefur verið gott og jafnvel mikið á köflum. Þessi góða vatnsstaða hefur jákvæð áhrif á veiðina og reynsluboltinn Ásgeir Heiðar sagði nýlega í samtali við Sporðaköst að hann hefði aldrei á sínum ferli upplifað jafn góðar aðstæður til laxveiða eins og í sumar. Var hann þar að vísa til þeirrar drjúgmiklu rigningar sem landsmenn hafa búið við. Fátt er eftirsóknarverðara en að koma að vatnsmikilli laxveiðiá sem er að sjatna eftir góða rigningu. Víst er að Laxá í Dölum og Stóra Laxá hafa svo sannarlega notið góðs af þessari veðráttu eins og sjá má á listanum hér að neðan yfir veiðina í helstu laxveiðiánum.
Í Ytri–Rangá hefur verið stöðug og góð veiði síðustu vikur. Hún gaf tæplega fjögur hundruð laxa í síðustu viku og er það fjórða vikan í röð þar sem hún er með fjögur hundruð laxa eða meira.
Miðfjarðará fór yfir tvö hundruð laxa í síðustu viku og Þverá/Kjarará var með 175 laxa. Selá og Hofsá fóru einnig vel yfir hundrað laxa og eru á svipuðu róli og í fyrra, sem var gott ár fyrir austan.
Þá er gaman að bera saman stöðuna í Langá og Jöklu miðað við veiðina á sama tíma í fyrra. Laxá í Dölum toppar þó allar hinar í aukningu milli ára. 23. ágúst í fyrra höfðu veiðst 208 laxar í henni. Nú er komin í 737. Þá komum við að upphafsorðum þessarar fréttar. Laxá hefur notið góðs af úrkomuörlæti veðurguðanna og laxinn gengið upp í Laxá hindrunarlítið og ekki þurft að bíða haustrigninga. Þær hafa verið í allt sumar. Viðbúið er því að haustveiðin verði minni en oft áður. Hins vegar er veiðin nú þegar orðin meiri en í allt fyrrasumar og afar líklegt að þetta verði besta veiðisumar í Dölunum frá 2018.
Meirihluti þeirra vatnasvæða sem eru á listanum eru þegar búin að skila meiri veiði en allt árið í fyrra. Þau svæði sem ekki hafa þegar toppað 2023 eiga stutt í það eða munu gera það vel fyrir lok veiðitímans.
Langt er síðan að jafn illa hefur gengið að selja veiðileyfi á Íslandi og fyrir þetta veiðisumar. Gildir þá einu hvort var um að ræða erlenda veiðimenn eða íslenska. Þetta sumar mun án efa gera það að verkum að fleiri verða tilbúnir til að kaupa leyfi næsta sumar. Vissulega mun þó skipta máli að verðin haldi ekki áfram að hækka með þeim hætti sem verið hefur undanfarin ár.
Hér er listi yfir tuttugu og tvær efstu árnar. Listinn er nú farinn að taka á sig afgerandi mynd og veiðin víðast hvar betri en á sama tíma í fyrra. Í nokkrum ám er hún mun betri, jafnvel miklu betri. Fyrsti dálkurinn er talan í viðkomandi á í lok dags, 21. ágúst. Dálkur tvö, veiðin í fyrra segir til um hver talan var í loks dags 23. ágúst í fyrra. Þriðji dálkurinn er svo veiðin vikuna 14. til 21. ágúst, samkvæmt tölum frá angling.is sem er vefur Landssambands veiðifélaga. Fjórði og síðasti dálkurinn segir til um prósentubreytingu milli ára miðað við 23. ágúst 2023 þar sem þær upplýsingar eru fáanlegar.
Vatnasvæði Í sumar 2023 Vikuveiðin Breyting í %
Ytri–Rangá 2536 2159 398 --
Þverá/Kjarará 1909 983 175 95%
Miðfjarðará 1701 898 213 98%
Norðurá 1384 773 94 78%
Eystri–Rangá 1254 1584 137 --
Selá í Vopnafirði 1037 951 142 12%
Langá á Mýrum 913 477 73 94%
Jökla 843 437 90 96%
Hofsá 801 847 129 -3%
Laxá á Ásum 771 515 57 --
Laxá í Dölum 737 208 83 --
Urriðafoss 719* 661 -- --
Grímsá 702 378 77 --
Haffjarðará 702 789 77 --
Elliðaár 690 470 53 50%
Laxá í Aðaldal 651 504 67 29%
Víðidalsá 593 422 42 49%
Laxá í Kjós 591 245 39 115%
Laxá í Leirársveit 585 274 48 --
Vatnsdalsá 491 258 46 --
Stóra Laxá 451 192 46 --
Við skoðum fleiri ár á morgun og hvernig veiðin hefur gengið í þeim í sumar.
Lengd á laxi | Veiðisvæði | Veiðimaður | Dagsetning Dags. |
---|---|---|---|
103 cm | Laxá í Aðaldal | Birgir Ellert Birgisson | 12. ágúst 12.8. |
103 cm | Miðsvæði Laxá í Aðaldal | Máni Freyr Helgason | 11. ágúst 11.8. |
101 cm | Laxá í Aðaldal | Agnar Jón Ágústsson | 10. ágúst 10.8. |
101 cm | Laxá í Aðaldal | Richard Jewell | 9. ágúst 9.8. |
100 cm | Laxá í Aðaldal | Björgvin Krauni Viðarsson | 9. ágúst 9.8. |
101 cm | Víðidalsá | N/A | 30. júlí 30.7. |
100 cm | Mýrarkvísl | Tim Racie | 23. júlí 23.7. |