Veiði | mbl | 3.9.2024 | 17:19

Besta laxveiðitímabilið frá 2018

Allt stefnir í að Jökla verði opin út veiðitímabilið. Það hefur ekki gerst síðustu ár, þar sem yfirfall úr Hálslóni hefur tekið fyrir veiðina. Nú er Jökla að nálgast þúsund laxa veiði. Ljósmynd/Morgunblaðið

Laxveiðin í sumar hefur víða farið fram úr væntingum og í nokkrum ám hressilega. Dæmi eru um ár með þrefalda veiði samanborið við sumarið í fyrra. Margar eru að gefa tvöfalda veiði og heilt yfir er allt sem bendir til þess að sumarið sé það besta frá því 2018. Árin 2019 til og með 2023 hafa verið langt undir meðaltalsveiði.

Hér að neðan er listi yfir þrjátíu laxveiðiár, sem við köllum stundum minni árnar. En það stafar af því að um er að ræða svæði með færri stöngum og eru oft á tíðum mun minni vatnasvæði en þekktustu laxveiðiárnar. Það breytir því þó ekki að margar af þessum ám bjóða úrvals veiði miðað við stangafjölda.

Nú þegar svo langt er liðið á veiðitímann er þessi aukning staðfest. Hvað sem gerist héðan af er ljóst að árið 2024 er það besta frá veiðisumrinu 2018. Það mun ekki sjást fyrr en lokatölur liggja fyrir hvoru megin það lendir í þeim samanburði.

Þrír fyrir einn í nokkrum ám

Þær ár sem eru með mestu aukninguna milli ára, miðað við stöðuna í dag, eru án efa Laxá í Dölum, Hrútafjarðará, Andakílsá, Mýrarkvísl og margar fleiri. Laxá í Dölum er komin yfir þúsund laxa en var aðeins með þriðjung þess afla á sama tíma í fyrra. Það þýðir að stöng sem skilaði níu löxum í fyrra á þremur dögum, hefur í sumar verið með 27 laxa. Miðað við meðaltalstölur. Hrútafjarðaráin var ekki komin í hundrað laxa í byrjun september í fyrra en er nú að nálgast óðfluga þrjú hundruð laxa. Svipuð staða er uppi í Andakílsá. Hún var í 120 löxum á þessum tíma í fyrra en er nú búin að jafna lokatölu síðasta sumars, með 347 laxa. September í fyrra gaf þar tæplega hundrað laxa.

Mýrarkvísl er að eiga sitt besta ár í langan tíma og er nú að nálgast þrjú hundruð laxa en var á þessum tíma í fyrra í 150 fiskum.

Jökla er í kringum 950 og búin að slá rækilega út bestu veiði sem hún hefur gefið, sem var 815 laxar sumarið 2015.

Miklar sveiflur hafa verið í veiði í Stóru Laxá síðustu ár en ljóst að hún er að eiga gott sumar og stefnir í spennandi lokatölu þar því september hefur oft verið hennar sterkasti mánuður. Aukningin í veiði í Stóru milli ára er ríflega hundrað prósent. Nú er hún í 500 löxum en var á sama tíma í fyrra í 211.

Fyrsti lax sumarsins í Elliðaánum þetta sumarið tók við Breiðuna. Allir vonuðust eftir góðu sumri og þær vonir hafa ræst. Nú hefur borgarperlan gefið 815 laxa og er það besta veiði frá 2018. Aukningin miðað við síðasta sumar er í dag 50%. mbl.is/Árni Sæberg

Stóru árnar, eins og Þverá/Kjarará og Miðfjarðará eru með mikla aukningu. Í dag mælist aukningin milli ára í Miðfjarðará 95% en í Þverá/Kjarará 86%. Tölur sem svo sannarlega er tekið eftir. Selá og Hofsá í Vopnafirði áttu gott ár í fyrra og eru að fylgja því eftir. Selá með betri veiði en Hofsá rétt svo undir í samanburðinum.

Líka vonbrigði inn á milli

Ef við lítum til Rangánna þá er þeirra hlutskipti ólíkt. Ytri–Rangá er að eiga betra sumar en í fyrra og er veiðin að nálgast þrjú þúsund laxa. Þeim áfanga náði hún ekki fyrr en langt var liðið á september í fyrra. Málum er öfugt farið í þeirri Eystri. Þar er veiðin töluvert undir því sem var í fyrra. Fjórtán hundruð laxar nú á móti sautján hundruð í fyrra.

Fleiri vonbrigði má sjá í sumar þó að góðu fréttirnar séu fjölmargar. Vatnasvæði Blöndu og Svartár er áhyggjuefni svo ekki sé meira sagt. Blanda er ekki svipur hjá sjón og er enn tuttugu prósent undir veiðinni í fyrra sem var mjög léleg. Svartá er sömuleiðis ekki að standa undir eðlilegum væntingum.

Affallið er dapurt í sumar og sama má segja um Þverá en þessar ár byggja á seiðasleppingum og virðist eitthvað hafa misfarist þar miðað við árin þar sem veiðin var mjög góð.

Veiðitölurnar hér að neðan miðast við veiði að loknum veiðidegi 28. ágúst. Dálkur tvö er veiði í þessum ám á sama tíma í fyrra. Raunar munar tveimur dögum því angling.is birtir alltaf tölur á fimmtudögum og það bar upp á 30. ágúst í fyrra. Allar þessar ár eiga því tvo daga inni. Þriðji dálkurinn er svo fjöldi veiddra laxa vikuna 21. – 28. ágúst. Síðasti dálkurinn segir til um prósentubreytingu milli ára, þar sem sú tala er tiltæk.

Vatnasvæði Veiddir laxar 2023 Vikan Breyting %

Skjálfandafljót 353 -- 36 --

Andakílsá 347 118 31 --

Svalbarðsá 335 252 27 --

Haukadalsá 339 223 34 51%

Hrútafjarðará 334 92 35 269%

Flókadalsá 333 191 48 --

Sandá í Þistilfirði 319 280 14 19%

Hítará 308 260 28 0%

Blanda 286 353 3 -18%

Miðfjarðará í Bakkaf. 284 180 11 61%

Hólsá Austurbakki 280 385 29 --

Mýrarkvísl 278 144 28 --

Straumfjarðará 256 231 21 10%

Hafralónsá 238 277 19 -13%

Brennan 214 122 19 79%

Leirvogsá 203 262 19 -21%

Úlfarsá (Korpa) 188 125 8 63%

Straumar 171 88 7 94%

Miðá í Dölum 157 77 4 93%

Fnjóská 139 254 17 --

Flekkudalsá 126 -- 3 --

Gljúfurá í Borgarf. 125 86 6 --

Laugardalsá 82 -- 11 --

Skuggi 77 68 1 --

Fljótaá 65 92 7 -19%

Sunnudalsá 64 62 -- -3%

Affall 60 180 18 --

Svartá í Húnavatnss. 60 68 4 -9%

Þverá í Fljótshlíð * 48 23 10 --

Þar með er tæmdur listinn sem angling.is birti síðastliðinn fimmtudag. Misjafnt er hvað er til af gögnum yfir þær ár sem eru neðarlega á listanum. Það varð dráttur á að síðari hluti listans birtist og er beðist velvirðingar á því. Umsjónarmaður var við veiðar og líklegt er að slík ástæða verði tekin gild hér.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.