Veiði | mbl | 5.9.2024 | 12:57

Átta ár komnar yfir þúsund laxa í sumar

Menn hafa glaðst yfir minni fiskum en þessum. Ragnar Atli Tómasson var hæst ánægður með þennan 90 sentímetra hæng sem hann fékk í Langhyl í Laxá á Ásum, á rauðan Frances. Ásarnir fara líkast til yfir þúsund laxa í sumar. Ljósmynd/Theodór K. Erlingsson

Átta laxveiðiár á landinu hafa náð fjögurra stafa tölu og útlit er fyrir tvær til þrjár bætist í þann hóp. Þá eru þrjár ár komnar yfir tvö þúsund laxa. Svona góð veiði hefur ekki sést á Íslandi frá sumrinu 2018.

Þær ár sem komnar eru yfir þúsund laxa eru, Ytri– og Eystri-Rangá sem byggja alfarið á seiðasleppingum. Svo eru það Þverá/Kjarará, Miðfjarðará, Norðurá, Selá, Laxá í Dölum og Langá. Þær ár sem munu ná þúsund laxa markinu á næstu dögum og vikum eru, Jökla, Hofsá og ef að líkum lætur Laxá á Ásum en hún fór síðast í þúsund laxa sumarið 2017.

Þessi langþráða aukning í veiði er tvíeggjað sverð. Sala til útlendinga og annarra sem halda uppi dýrasta tímanum í bestu veiðiánum, var orðin verulega erfið. Langt er síðan að lausar stangir voru í flestum ám á landinu á besta tíma, þegar veiðisumarið hófst. Íslenskir veiðimenn sáu jafnvel fyrir sér verðlækkanir og þar með möguleika á að komast í betri veiði fyrir lægri upphæðir. Þær vonir eru að engu orðnar. Íslensk laxveiði mun seljast vel í vetur og ekki síst meðal erlendra veiðimanna. Fyrir því eru nokkrar ástæður. Gott veiðisumar nú er ávísun á meiri áhuga. Veiðimenn eru jú oftast að kaupa veiði síðasta árs. Noregur er í mikilli óvissu og vandséð að veiðifólk sé að greiða inn á stangir þar þegar óvíst er hvort árnar verða opnar fyrir veiðimönnum. Rússland er lokað og veiði í Skotlandi hefur ekki verið upp á marga fiska. Ísland er síðasta vígið þegar kemur að Atlantshafslaxi, eins og staðan er núna. Vissulega kann það að breytast en þetta er staðan eins og hún blasir við fyrir sumarið 2025.

Hinn hefðbundni íslenski launamaður mun því halda áfram að sækjast eftir vor og haust veiði þegar leyfin eru ekki í hæstu hæðum.

Lax á í Bugðufossi í gær í Kjósinni. 24 laxar komu á land þar í gær. Mikið vatn er í Laxá í Kjós og spennandi dagar gætu verið framundan hjá veiðimönnum sem verða þar á næstunni. Ljósmynd/Laxá í Kjós

Smálaxinn mætti loksins í einhverju magni og hefur haldið uppi veiðinni og stefnir í bestu laxveiði hér á landi frá árinu 2018.

Laxá á Ásum stendur í 888 löxum og telja verður líklegt að hún fari yfir þúsund laxa sem gerðist síðast árið 2017. Nóg magn af laxi er í Ásunum. Líklegra er að veðurguðirnir hafi mestu áhrifin á hvort að þúsund laxa markinu verður náð. Jökla mun ná þessu sama marki á næstu dögum. Er nú í 968 löxum eftir fjórtán fiska dag í gær. Svipuð staða er uppi í Hofsá sem væntanlega fer í þúsund laxa fyrir miðjan mánuðinn.

Besta vikuveiðin var í báðum Rangánum en Miðfjarðará gaf 159 laxa og hefur veiðin þar í sumar verið afbragðsgóð. Þverá/Kjarará fór yfir laxa í vikunni, eins og Selá í Vopnafirði.

Hér er listi yfir tuttugu og tvær efstu árnar. Fyrsti dálkurinn er talan í viðkomandi á í lok dags, 4. september. Dálkur tvö, veiðin í fyrra segir til um hver talan var í loks dags 6. september í fyrra. Þriðji dálkurinn er svo veiðin vikuna 28. ágúst til 4. september, samkvæmt tölum frá angling.is sem er vefur Landssambands veiðifélaga. Fjórði og síðasti dálkurinn segir til um prósentubreytingu milli ára miðað við 4. september 2023 þar sem þær upplýsingar eru fáanlegar.

Vatnasvæði Í sumar 2023 Vikuveiðin Breyting í %

Ytri–Rangá 3084 2571 218 --

Þverá/Kjarará 2108 1169 110 85%

Miðfjarðará 2055 1089 159 94%

Norðurá 1555 961 95 67%

Eystri–Rangá 1547 1874 145 --

Selá í Vopnafirði 1264 1138 114 12%

Langá á Mýrum 1084 528 74 108%

Laxá í Dölum 1032 390 84 --

Jökla 968 450 52 119%

Hofsá 931 959 74 -3%

Laxá á Ásum 888 597 68 --

Elliðaár 836 568 76 50%

Grímsá 802 492 51 --

Haffjarðará 782 905 38 --

Laxá í Aðaldal 738 595 24 26%

Urriðafoss 719* 701 -- --

Víðidalsá 713 529 69 43%

Laxá í Kjós 666 340 52 91%

Laxá í Leirársveit 645 374 40 --

Vatnsdalsá 563 314 39 --

Stóra Laxá 561 256 61 --

Við skoðum fleiri ár á morgun og hvernig veiðin hefur gengið í þeim í sumar.

*Tala frá 24. júlí.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.