Norðurá á pari við 50 ára meðaltal

Sá jákvæði tónn sem Norðurá og fleiri laxveiðiár í Borgarfirði gáfu í upphafi veiðitímans í vor hefur hefur haldist út sumarið og síðasti laxinn í Norðurá í sumar veiddist í fyrradag. Lokaniðurstaðan er 1703 laxar. Það er nákvæmlega á pari við fimmtíu ára meðaltalsveiði í ánni. Fara þarf aftur til áranna 2017 og 2018 til að finna sambærilega veiði, en bæði árin var Norðuráin rétt í kringum 1700 laxa. Síðasta stóra árið í Norðurá var 2015 þegar hún gaf yfir þrjú þúsund laxa. Þetta er mikill bati frá síðustu árum þegar kemur að veiði í Norðurá.

Haust við Norðurá. Allar árstíðir hafa sinn sjarma. Veiðin í sumar í Norðurá er á pari við hálfrar aldar meðtal sem 1699 laxar. Ljósmynd/AÞ

2024 1703 laxar

2023 1087 laxar

2022 1352 laxar

2021 1431 laxar

2020  730 laxar

2019  577 laxar

2018 1692 laxar

2017 1719 laxar

2016 1342 laxar

2015 3030 laxar

Eins og sést hér að ofan voru árin 2018 og 2017 sambærileg við sumarið í sumar. Hins vegar er árið 2015 síðasta stóra árið í Norðurá þegar hún fór yfir þrjú þúsund laxa.

Haustið er árstíð litanna. Laxinn tekur á sig fallegan lit þegar nálgast hrygningu. Ljósmynd/AÞ

Þær raddir hafa heyrst að veiði í sumar sé ekkert svo sérstök þegar litið er þess þegar Norðurá var og hét. Það hafa vissulega komið mörg ár þar sem Norðurá fór yfir tvö þúsund laxa og jafnvel nokkur ár þar sem hún fór yfir þrjú þúsund laxa. Við tókum okkur þess vegna til og reiknuðum út meðaltalsveiði frá árinu 1974, eða eins langt aftur og skráning nær, það er á angling.is. Fimmtíu ára meðaltal í Norðurá er 1699 laxar. Hún er því nákvæmlega í meðaltalinu í sumar. Vissulega hefur orðið breyting á og kannski mest sú að í sumar var 80 prósent af öllum laxi sleppt en sú var ekki raunin hér á árum áður. En Norðurá náði sem hálfrar aldar meðaltalinu í sumar. Það staðfestir betur en nokkuð annað hversu batinn var mikill í sumar.

• Blogga um frétt

Seinustu hundraðkallar sumarsins