Litlu árnar sem urðu „stórar“ í sumar

Nokkrar af minni laxveiðiánum urðu „stórar“ þegar kemur að veiðitölum sumarsins. Þar fara fremstar í flokki Andakílsá og Hrútafjarðará sem báðar gáfu miklu betri veiði en í fyrra. Fleiri ár vekja athygli fyrir góðan bata. Þar má nefna Flókadalsá, Svalbarðsá, Mýrarkvísl og Miðfjarðará í Bakkafirði. Ósasvæðin sem liggja að Hvíta í Borgarfirði nutu einnig góðs af ágætu smálaxaári og mátti sjá mikla aukningu í Brennunni og Straumunum.

En svo er það hin hliðin. Þó nokkrar ár gáfu mun minni veiði en vonir stóðu til. Blanda er þar fremst í flokki og Austurbakki Hólsár olli vonbrigðum. Blanda er niður um níu prósent frá árinu í fyrra sem var virkilega dapurt. Sumarið í sumar er lélegasta veiðisumar í Blöndu í hálfa öld. Ljóst er finna þarf svör við stóru spurningunni, hvað hefur gerst í Blöndu? Svartá sem fellur í Blöndu er sama marki brennd. Veiðin í sumar olli vonbrigðum. Fish Partner tók í gær formlega við Blöndu og Svartá þegar samningur um umboðssölu var samþykktur á félagsfundi. Verk er að vinna á vatnasvæðinu og komast þarf að hvað veldur hruninu sem Blanda stendur frammi fyrir.

Fleiri ár stóðu ekki undir væntingum. Fnjóská er hálfdrættingur miðað við veiðina í fyrra. Hafralónsá var langt undir tölum síðasta árs og Leirvogsá olli vonbrigðum. 

Þegar horft er sérstaklega til Snæfellsness má sjá að árnar þar hafa ekki notið veiðibata með sama hætti og ár í Borgarfirði. Haffjarðará, Straumfjarðará og Hítará voru ekki að bæta við sig að sama skapi og margar aðrar ár á Vesturlandi. Svæðið er kaldara og svo kann að vera að þessi bati skili sér frekar á næsta ári, hafi seiðin í þessum ám þurft ári lengur en gerist og gengur.

Veiðitöl­urn­ar hér að neðan miðast við veiði að lokn­um veiðidegi 25. september. Dálk­ur tvö er heildarveiði í ánni í fyrra. Þriðji dálkurinn segir til um prósentubreytingu milli ára, þar sem sú tala er tiltæk.

Vatna­svæði         Veidd­ir lax­ar   2023     Breyting %

Anda­kílsá                   490         177          --

Hrúta­fjarðará             451          185       161%

Sval­b­arðsá                418         340          --

Hauka­dalsá               418         373          11%

Flókadalsá                 414         248          -- 

Hítará                        407         426         -4%

Mýr­arkvísl                  406          283           --

Skjálf­andafljót            382          --             --

Sandá í Þistil­f­irði         373         336         16%

Straum­fjarðará           366         345          6%

Blanda                       327         359         -9%

Miðfjarðará í Bakkaf.   305         191          60% 

Hólsá Aust­ur­bakki       295         426           --

Hafralónsá                  287         333        -14%

Leir­vogsá                   279          303         -8%

Úlfarsá (Korpa)           249          173         50%

Brenn­an                     228          122          87%

Miðá í Döl­um              197           144          38%

Gljúf­urá í Borg­arf.       183           171          --

Straum­ar                   171            92          86%

Fnjóská                      170           331           --

Flekku­dalsá                148            --            --

Fljótaá                       113            102       -10%

Laug­ar­dalsá                111            --            --

Svar­tá í Húna­vatnss.   109            131         -14%

Affall*                        100            381          --

Skuggi                        81             77            --

Sunnudalsá*               72             73           -1%

Þverá í Fljótshlíð*        58              76            --

Þar með er tæmd­ur list­inn sem angling.is birti í gær. Mis­jafnt er hvað er til af gögn­um yfir þær ár sem eru neðarlega á list­an­um. 

*Vantar nýjustu tölur.

Lokatölur eru feitletraðar.

• Blogga um frétt

Seinustu hundraðkallar sumarsins