Fyrirkomulag rjúpnaveiða staðfest

Guðlaugur Þór Þórðarson, umhverfis-, orku- og loftslagsráðherra, hefur staðfest tillögur Umhverfisstofnunar að fyrirkomulagi rjúpnaveiða fyrir árið 2024.

Þessu til staðfestingar hefur verið gefin út reglugerðarbreyting 1080/2024 á reglugerð nr. 456/1994 um fuglaveiðar og nýtingu hlunninda af villtum fuglum, að því er stofnunin greinir frá. 

Þá segir, að tillögurnar hafi verið unnar eftir nýju veiðistjórnunarkerfi sem var tekið upp með stjórnunar- og verndaráætlun rjúpu sem ráðherra undirritaði 11. september.

„Veiðidagar verða heilir og heimilt er að veiða frá og með föstudögum til og með þriðjudögum innan veiðitímabils. Landinu er skipt upp í sex mismunandi svæði og ný stofnlíkön hafa reiknað út ákjósanlega lengd tímabils á hverju svæði fyrir sig.“

Þá biðlar Umhverfisstofnun sérstaklega til veiðimanna að sýna hófsemi við veiðar. Mikilvægt sé að allir hagsmunaaðilar komi að því hvatningarátaki.

Tekið er fram, að sölubann á rjúpu sé enn í gildi.

• Blogga um frétt

Seinustu hundraðkallar sumarsins