Mikil spenna fyrir Tungufljóti - 15 tilboð

Sjö aðilar lögðu fram samtals fimmtán tilboð í veiðirétt í Tungufljót í Skaftafellssýslu. Tilboðin voru opnuð í dag klukkan þrjú á skrifstofu Landssambands veiðifélaga. Ljóst var fyrir útboðið að fjölmargir voru áhugasamir. Sú varð líka raunin. 

Félögin sem sendu inn tilboð voru, Stangaveiðifélag Reykjavíkur, FHD ehf, Hreggnasi ehf, Fish Partner, Uppstream slf, Pesca Travels ásamt FFII og Magnús Árnason og Helgi R. Helgason.

Hæsta tilboðið, þegar horft er til hreinna tilboða og einblínt á krónutölu, barst frá Hreggnasa ehf eða samtals upp á 127 milljónir króna á samningstímanum, sem er til fimm ára. En Hreggnasi var einnig með fráviksboð sem hljóðaði upp á 276 milljónir en gegn tíu ára samningi. Hreggnasi er með Laxá í Dölum, Grímsá og fleiri ár á leigu.

Fish Partner, sem var með Tungufljótið á leigu bauð 125 milljónir og var einnig með frávikstilboð.

FHD var með tilboð upp á 104 milljónir til fimm ára og þrjú tilboð bárust þar sem var um að ræða skipta áhættu eða umboðsölu.

Í útboðsgögnum var settur hefðbundin fyrirvari um að útboðsaðili væri óbundinn. Við taka væntanlega viðræður við hæstu tilboðsgjafa. Formaður veiðifélagsins er Guðlaugur Þór Þórðarson ráðherra.

Sporðaköst minnast þess ekki að hafa séð svo há tilboð í útleigu á sjóbirtingsá og má kannski segja að þetta sé afrakstur þess að nú er öllum sjóbirtingi sleppt í Tungufljóti og veiðin þar síðustu ár hefur verið góð. Þó var nýliðið tímabil lakara en sveiflur hafa verið miklar í sjóbirtingsveiði síðustu ár. 

• Blogga um frétt

Seinustu hundraðkallar sumarsins