Rjúpnaveiði hafin með nýju fyrirkomulagi

Sölubann er á rjúpu og áfram er við líði verndarsvæði á SV–landi líkt og verið hefur undanfarin ár.

Nýja fyrirkomulagið við veiðarnar var kynnt á vef Stjórnarráðsins í október. Þar sagði í fréttatilkynningu sem birtist 7. október.

„Stjórnunar- og verndarætlunin er afrakstur samstarfs Umhverfisstofnunar, umhverfis-, orku- og loftslagsráðuneytis, Náttúrufræðistofnunar, SKOTVÍS og Fuglaverndar. Þá naut samstarfshópurinn aðstoðar frá Dr. Fred A. Johnson, bandarískum sérfræðingi í veiðistjórnun og stofnlíkanagerð.

Guðlaugur Þór Þórðarson, umhverfis-, orku- og loftslagsráðherra: „Þetta er í fyrsta skipti sem veiði fer fram samkvæmt nýrri stjórnunar- og verndaráætlun. Áætlunin er mikilvægur liður í því að stuðla að því að veiðar séu sjálfbærar og að rjúpnastofninn haldi sínu hlutverki sem lykiltegund í sínu vistkerfi. Með þessu nýja kerfi viljum við enn fremur stuðla að gagnsæi, fyrirsjáanleika og skilvirkni veiðistjórnunar á rjúpu svo traust geti ríkt á milli opinberra stofnana, hagsmunaaðila og almennings.“

Stefna stjórnvalda er að nýting rjúpnastofnsins, líkt og annarra auðlinda, skuli vera sjálfbær. Jafnframt skuli rjúpnaveiðimenn stunda hóflega veiði til eigin neyslu. Til að vinna að sjálfbærri veiðistjórnun eru stundaðar mikilvægar rannsóknir og vöktun á stofninum og fyrir hendi er stjórnkerfi til að stýra veiðinni að viðmiðum um hvað telst sjálfbær nýting.“

Það hefur oft þurft að bíða fram á síðasta dag eftir ákvörðunum um hvernig rjúpnaveiðum verður háttað. Nú er nýja fyrirkomulagið með þeim hætti að slík bið á að vera úr sögunni. Margir veiðimenn hafa þakkað sínum sæla að slíkt fyrirkomulag tók gildi áður en ríkisstjórnin gaf upp laupana. Viðbúið að rjúpnaveiði hefði verið eitthvað sem hinir ólíku flokkar í þriggja flokka ríkisstjórninni hefur þurft að takast á um. Nú þarf ekki að hafa áhyggjur af því.

Framundan er spennandi tími fyrir veiðimenn en rétt er að benda veiðimönnum á að fylgjast vel með veðurspám, gera ferðaplön og vera rétt og vel útbúnir. Veiða hóflega og ganga vel um sín veiðisvæði.