Spádómur fyrir veiðina 2025 er klár

Spálíkan um laxveiði sem tekur mið af hitastigi á fæðuslóð laxaseiða þegar þau ganga út hefur vakið mikla athygli meðal veiðimanna. Í fyrra var spáð verulegum bata í smálaxi út frá þessu spálíkani. Það gekk eftir. Nú er búið að uppfæra líkanið fyrir sumarið 2025.

Það eru fiskifræðingarnir Jóhannes Guðbrandsson og Sigurður Már Einarsson sem hönnuðu líkanið. Hitastigið á fæðuslóðinni sumarið 2023 var ellefu gráður. Það var töluverð hækkun hitastigs og gaf líkanið þá til kynna að umtalsverð aukning yrði í göngu smálaxa í ár á Vesturlandi. Vissulega horfa áðurnefndir fiskifræðingar fyrst og fremst til þess landshluta en þó virðist sem áhrifin teygi sig lengra. Bæði hvað varðar Suðurland og drjúgan hluta Norðurlands.

Sigurður Már Einarsson mætti í myndver hjá mbl.is til að ræða spálíkanið sem hann og Jóhannes Guðbrandsson hafa hannað. Spáin fyrir næsta sumar hljóðar upp á samdrátt í smálaxi. Ljósmynd/Kristófer Liljar

Mæling meðaltalshita á sama svæði síðastliðið sumar sýndi hitastigið 10,3 gráður. Það er ofurlítil kólnun frá því í fyrra. En gráðubrotin eru býsna dýrmæt í þessum mælingum. Sigurður Már Einarsson mætti fyrir hönd þeirra félaga í myndver mbl.is á dögunum og fór yfir útlitið þegar hitatölurnar liggja fyrir. Það er skemmst frá því að segja að það verður minna af smálaxi í sumar en í fyrra, á Vesturlandi samkvæmt þessu. Þetta er ekki endilega stór sveifla en hún er niður á við. Á móti kemur sú staða að góðar líkur eru á góðu stórlaxasumri. Smálaxinn í fyrra var betri en í mörg ár og þá eru allar líkur á að árið á eftir sé ávísun á gott stórlaxasumar.

Hér má sjá hvar á spálíkaninu útlit er fyrir að 2025 lendi. Lárétti ásinn er hitastigið árinu áður og græna örin bendir á líklegan skurðarpunkt. Lóðrétti ásinn er svo fjöldi laxa á Vesturlandi. Grafík/Hafrannsóknastofnun

Ágúst gæti reynt á þolrifin

Í viðtalsbrotinu sem hér fylgir fer Sigurður Már yfir stöðuna. Græna örin sem merkt er inn á línuritið gefur til kynnar hversu margir smálaxarnir geta orðið á Vesturlandi í sumar. Punkturinn fellur á milli tíu og ellefu þúsund laxa. Þeir voru í fyrra um 14.200. Til samanburðar var laxagangan á Vesturlandi sumarið 2023 undir tíu þúsund löxum.

Gangi þessi spá eftir er líklegt að veiði verði spennandi fyrri hluta sumars, þegar stórlaxinn gengur. Það gæti hins vegar reynt á þolrif veiðimanna í ágúst ef lítið verður af smálaxi. Haustið gæti svo aftur orðið betra.

Í viðtalsbrotinu sem fylgir með fréttinni fer Sigurður Már yfir spálíkanið. Þeir sem vilja meiri og fyllri upplýsingar geta hlustað á viðtalið í heild sinni með því að smella á linkinn hér að neðan.

• Blogga um frétt

Seinustu hundraðkallar sumarsins