Ekki þægilegt að vinna undir umræðunni

Umræða laxveiðimanna og eldismanna hafa verið hávær og afskaplega skautuð, eða pólariseruð. Millivegurinn er ekki til. Guðni Guðbergsson sviðsstjóri hjá Hafrannsóknastofnun kannast við þessa hörðu umræðu þegar kemur að umræðu um sjókvíaeldi. „Það er ekki auðvelt að vinna undir þessari umræðu,“ viðurkennir Guðni. Hann bendir líka á að persónur og leikendur séu dregnir inn í umræðuna og einnig komi til þrýstingur frá stjórnmálunum.

Áhættumatið margnefnda er lykilgagn í ákvarðanatöku þegar kemur að sjókvíaeldi. Guðni líkir áhættumatinu við fiskveiðistjórnunarkerfið þar sem fylgst er grannt með stöðu stofna og dregið úr sókn ef útlit er fyrir að gengið sé á fiskistofn. Hann segir áhættumatið eiga að virka á svipaðan hátt. „Ef að umhverfisáhrifin er talin óásættanleg þá þarf að draga úr eldinu. Það þarf að finna þessi mörk og það er ekkert þægilegt að vinna það undir þessari pólariseruðu umræðu,“ sagði Guðni í spjalli á Sporðaköstum hér á mbl.is, í lok janúar.

Frétt af mbl.is

Niðurstöður um erfðamengun fljótlega

Þarf svolitla þolinmæði

Þar ræddi hann meðal annars um áðurnefnda umræðu milli þessara tveggja hópa sem tekist hafa á af hörku. „Við höfum alltaf lagt áherslu á að það skiptir máli að hafa þekkingu, það skiptir máli að byrja tiltölulega hægt og byrja tiltölulega örugglega. Þannig að menn læri á umhverfið, aðstæður og viti hverjir eru áhættuþættirnir og hverju við getum breytt og hverju við getum ekki breytt. Þá þarf svolitla þolinmæði til þess að læra á það án þess að lenda í einhverju stóru að það sé óafturkræft. Þá erum við að tala um pólitík og pólitíska pressu og það er ekki líffræði,“ upplýsir Guðni.

Hann nefnir að persónur og leikendur hafi verið dregnir inn í umræðuna og það þekkja allir sem fylgst hafa með þessum skoðanaskiptum. Aðspurður hvort að það sé ekki óumflýjanlegt að þessar tvær atvinnugreinar, fiskeldi og laxveiðin muni þurfa að lifa saman, svarar hann: „Miðað við stöðuna eins og hún er núna. Þá erum við þar. Já.“

Þátturinn með Guðna Guðbergssyni þar sem hann ræðir um margvísleg málefni sem tengjast laxi og öðrum fiskum má finna með því að smella á linkinn hér að neðan.

Frétt af mbl.is

Erfðamengun, „útlenskur“ lax og hnúðlax

• Blogga um frétt

Seinustu hundraðkallar sumarsins