Ísinn er brotinn

Ísinn er brotinn – með staðfestingu á úthlutun Fjarskiptasjóðs á 450 milljónum til stuðnings við byggingu ljósleiðarakerfa á þeim svæðum sem ekki hafa áður séð raunhæfan möguleika á slíkum kerfum. Sótt var um stuðning við 1.700 tengingar og alls um 1,1 milljarð. Um 1.100 tengingar fá stuðning að þessu sinni.

Sá mikli fjöldi umsókna sem barst Fjarskiptasjóði um styrk til lagningar á ljósleiðarakerfum sýnir mikinn kraft og ekki síst mikla eftirspurn eftir raunverulegum framtíðarlausnum í fjarskiptum landsmanna.

Allt til þessa tíma hefur það verið talið næsta óraunhæft að ráðast í slíkt átak. Með útkomu skýrslu‚ Ísland – ljóstengt, var sleginn sá tónn að vel mætti kljúfa þann kostnað. Við undirstrikum að við erum ekki aðeins að byggja kerfi fyrir dreifbýli. Við erum að endurnýja grunnkerfi fjarskipta, við erum að skapa forsendur fyrir því að átakið, ljósleiðaranetið, verði bakhjarl farnetskerfa á 70% af landsvæði í byggð. Við munum verða þjóð sem getur státað af heildstæðu, opnu og hraðvirku fjarskiptakerfi.

Átakið er innviðabylting

Fjarskiptasjóður fór að þessu sinni þá leið að úthluta fjármunum eftir samkeppni. Sú leið tryggir að við getum fengið stóran áfanga og hraða uppbyggingu. Hún tryggir að þau sveitarfélög sem lengst hafa unnið að úrbótum í fjarskiptum geta hafist handa. Hún tryggir að við fáum sem þjóð hámarksnýtingu á fjármunum sem lagðir eru til verksins. Úthlutunaraðferðin er gagnsæ og hefur þann kost að regluverk fjarskiptamarkaðarins er ekki til verulegra trafala.

Aðferðin nær hins vegar ekki öllum markmiðum samtímis – hún styður ekki við aðra stefnu um mögulegan forgang þeirra byggða sem skilgreindar hafa verið sem veikar byggðir. Hún tryggir ekki skýr svör um hvenær og hvernig hvert einstakt byggðarlag mun fá stuðning á næstu árum. Við erum meðvituð um þessar áskoranir. Við teljum forgangsmál að allt undirbúningsferli fyrir næsta ár verði komið á hreint, sem og aðferð úthlutunar, svo að næstu styrkþegar verði komnir með skýra mynd á haustdögum. Vonir okkar standa til þess að auglýsa megi næsta áfanga síðla sumars eða í haust, þó sagt hér með fyrirvara. Það má ekki seinna vera því veruleg vinna liggur í undirbúningi framkvæmda og ekki veitir af haustinu og vetrinum til þeirrar vinnu.

Í upphafi var sagt að ísinn væri brotinn – á síðustu tveimur árum hefur verið lagður um milljarður til stuðnings við lagningu ljósleiðara. Það er til stuðnings ákveðnum verkum, eins og hringtengingar og fleira. Á sama tíma hafa fjarskiptafélög og sveitarfélög lagt verulega fjármuni í fjárfestingar í bættum fjarskiptum.

Nýir tímar

Möguleikar fyrir fólk og fyrirtæki að velja sér starfsemi, búsetu og frelsi til athafna eru gjörbreyttir. Bætt fjarskipti snúast um frelsi fólks til að velja sér búsetu og störf. Við getum fæst fullyrt hvaða þróun fylgir í kjölfarið á slíkri byltingu – en við vitum að þráin eftir þeim breytingum hefur skilað okkur hingað í dag – að átakið Ísland ljóstengt er orðið að veruleika.

Við óskum þeim heimilum og fyrirtækjum sem nú sjá fram á byltingu í fjarskiptamálum til hamingju. Það geta því miður ekki allir verið fyrstir en þá skiptir máli að stefnan sem hefur verið mörkuð haldi og við sameinumst um að klára verkið. Ekkert annað stendur til af þeim ríkisstjórnarflokkum sem þessa vegferð hófu.

Ísland ljóstengt er lagt af stað

Við erum að skapa forsendur fyrir því að ljósleiðaranetið geti verið bakhjarl farnetskerfa á 70% af landsvæði í byggð. Við munum verða þjóð sem getur státað af heildstæðu, opnu og hraðvirku kerfi. Ísland mun í lok átaksins verða það land sem hefur náð hvað mestri útbreiðslu nútímalegra háhraðakerfa. Átakið er ein mesta innviðabylting seinni ára.