Einar Geir Þorsteinsson

Í dag er borinn til grafar ástkær tengdafaðir minn Einar Geir Þorsteinsson. Hann átti góða og farsæla ævi. Ég kynntist honum árið 1985 er ég kynntist syni hans Þorsteini Einarssyni.  Einar Geir átti viðburðarríka og góða ævi og var umkringdur fjölskyldu og vinum sem elskuðu hann og dáðu. Hann fæddist á bænum Vatnsleysu í Biskupstungum 7. ágúst 1930 og var því á 89. aldursári. Foreldrar hans voru Ágústa Jónsdóttir húsmóðir og Þorsteinn Sigurðsson bóndi á Vatnsleysu. Þorsteinn var höfðingi mikill en mér hefur alltar fundist mikil líkindi með þeim feðgum af þeim sögusögnum og myndum sem ég hef séð. Einar var einn af 9 systkinum þannig að það hefur oft verið kátt á hjalla á bænum. Af þeim eru 3 á lífi í dag.
Minning mín um hann er mjög falleg og góð. Í hjarta mínu er mikið þakklæti fyrir að hafa kynnst þessum mikla sómamanni. Hann var einn af þeim sem var alltaf að og féll sjaldan verk úr hendi hvort sem það var á heimili sínu á Móaflöt í Garðabæ eða í sumarbústaðnum Kjarri í Biskupstungnum. Hann tók mér strax afskaplega vel og fann ég strax að um góðan og gegnheilan mann var að ræða. Hann reyndist mér og mínum alltaf vel í gegnum tíðina og var alltaf til staðar. Þegar sonur fæddist árið 1990 blasti það við að hann var skírður í höfuðið á honum enda um alnafna að ræða.
Einar Geir var með gagnfræðipróf frá Héraðsskólanum á Laugarvatni. Hann starfaði við ýmis ábyrgðarstörf. Hann kynntist Ingveldi Björgu Stefánsdóttur sem bjó á Syðri- Reykjum í sömu sveit og þau felldu hugi saman. Þau fluttu úr sveitinni og starfaði Einar sem gjaldkeri hjá Landsbanka Íslands frá árinu 1960 til 1965. Þá var hann gjaldkeri og bókari hjá Eggerti Kristjánssyni og co hf. frá árinu 1965 til 1971. Þá tók hann við sem framkvæmdastjóri samvinnufélagsins Hreyfils frá árinu 1971 til 1989. Þar starfaði hann einmitt þegar ég kynntist honum. Hann endaði starfsævi sína sem starfsmannastjóri Heilsugæslunnar í Reykjavík. Hann var mikið í félagsmálum og Framsóknarmaður mikill. Hann var m.a. bæjarfulltrúi Framsóknarflokksins í Garðabæ frá árinu 1978 til 1990. Einnig sat hann í miðstjórn Framsóknarflokksins til margra ára. Hann var einnig í Karlakórnum Fóstbræðrum allt frá sjöunda áratugnum og var formaður kórsins á árunum 1969 til 1974.
Einar Geir var mikið glæsimenni, glaðvær, mikill söngmaður og barngóður með eindæmum. Hann var Tungnamaður í húð og hár og undi sínum hag vel í sumarbústaðnum Kjarri í landi Vatnsleysu. Þar elskaði hann að vera og dunda sér við hitt og þetta. Einnig var hann alltaf mættur í réttir Tungnamanna og stýrði þar söng af mikilli röggsemi. Oftar en ekki kom í sjónvarpsfréttum réttarsöngur Tungnamanna með Einar Geir í fararbroddi söngmanna.
Einar Geir var mikill fjölskyldumaður og unni henni framar öllu. Hann eignaðist 4 börn og átti fjöldann allan af barnabörnum og einnig barnabarnabörn. Hann hafði mikinn áhuga á þeim og fylgdist vel með þeirra lífi. Hann hafði unun af yngstu börnunum og fundu þau það og vildu alltaf hitta afalang. Barnabarn mitt hafði mikla ástúð á honum, spurði oft um hann og vildi fara og hitta hann. Ekki var verra að fá kex hjá honum. Mér er minnistætt að hann hafði fyrir því að koma með kex með sér ef hann vissi að hann myndi hitta lítinn vin.
Einar Geir og Ingveldur Björg Stefánsdóttir gengu í hjónaband árið 1959 og var hjónaband þeirra gæfuríkt. Þau kynntust í Biskupstungum en byggðu sér framtíðarheimili í Garðabænum. Það var á Móaflötinni og hafa þau búið þar síðan. Ber heimilið vitni um natni og snyrtimennsku. Samband þeirra var einstaklega náið og er missir Ingveldar mikill.
Dýrmætar eru minningar um hinstu ferð Einars sem var ferð stórfjölskyldunnar til  Króatíu dagana 13. júní til 24. júní  sl. en þar áttum við yndislega samveru og gleðistundir. Einar Geir lést einungis 2 dögum eftir heimkomuna. Hann var fram á hið síðasta hress og kátur og undi hag sínum vel með fjölskyldunni sinni sem hann unni svo heitt.
Það er svo sárt að kveðja en ég veit að Einar Geir mun lifa áfram í hjörtum okkar og minningum. Einar var glæsilegur maður sem átti gott líf. Ég lærði margt af honum og minning hans mun lifa í mínu hjarta um ókomna tíð.
Ég kveð kæran tengdaföður minn með virðingu og er mér þakklæti nú efst huga fyrir að hafa kynnst þessum góða manni. Hafðu þökk fyrir allt. Hvíl í friði.

Draumalandið

Þín tengdadóttir,