Ketill Ágúst Kierulf Larsen fæddist 1. september 1934.
Hann lést 26. apríl 2018.
Útför hans fór fram 14. maí 2019.
Undir lok nóvembermánaðar árið 2017 sátum við þrír félagar og vinir, ég,
Ketill Larsen og Sigurður bróðir minn, á bókakaffi Eymundsson við
Skólavörðustíg. Fátt skyggði á gleði okkar við þetta tækifæri. Við höfðum
ekki hist lengi og áttum þarna ákaflega ánægjulega stund. Ég dvaldi
erlendis en hugði á langa veru heima að vori. Sannarlega var inni í
myndinni að við félagar hittumst að nýju með hækkandi sól og ættum góðar
stundir saman.
En maðurinn með ljáinn lætur sér í léttu rúmi liggja áform og óskir okkar
dauðlegra manna. Ketill lést 26. apríl þá um vorið og Sigurður bróðir minn
kvaddi þennan heim rétt tveimur mánuðum síðar. Og þá var heilsu minni
þannig varið að ég gat ekki komið því við að heimsækja föðurlandið né
heldur fylgt þessum dýrmætu vinum og samferðamönnum seinasta spölinn. Ekki
heldur hafði ég líkamlegt þrek til að skrifa minningargrein um Ketil vin
minn sem ég hafði þó ætlað mér. Skal nú bætt úr því þó að seint sé.
Þó að liðin sé tæplega hálf öld síðan er mér enn í fersku minni dagurinn
þegar leiðir okkar Ketils lágu saman í fyrsta sinn. Er grunur minn sá að ég
sé ekki sá eini sem svo er farið. Þetta mun hafa verið sumarið 1960 og ég
10 ára gamall. Mér hafði verið boðið að vera liðléttingur á Engi, aðallega
til að vera jafnaldra mínum og vini, Guðlaugi Magnússyni, Dengsa, til
aðstoðar og skemmtunar. Ég kom að áliðnum degi heim að Engi. Á hlaðvarpanum
var hópur fólks, fjölskylda og nágrannar. Síðar komst ég að því að það var
algengt að mannmargt væri á Engi því þjóðleið lá um hlað og öllum tekið
vel. Einn maður skar sig úr í hópnum. Hann var hávaxinn og myndugur að sjá
og allt fas og yfirbragð var með öðrum hætti en títt var þá og síðar. Þó að
honum lægi ekki hátt rómur var hann miðpunktur athyglinnar. Þetta var að
sjálfsögðu Ketill Larsen.
Fyrstu dagana gaf Ketill sig lítið eða ekkert að okkur strákunum. Hann fór
burt á morgnana og kom heim síðdegis. Þessa fyrstu daga gaf hann sig heldur
ekkert að bústörfum enda of fínn í tauinu til þess eins og þá var sagt.
Satt að segja var ég nánast smeykur við Ketil til að byrja með vegna þess
að mér virtist hann fjarrænn, strangur og fáskiptinn.
Svo kom sá dagur að Ketill fór ekki að heiman um morguninn. Hins vegar var
hann mættur á vettvangi bústarfanna, kominn í vinnuföt og hóf þegar að
stjórna búinu og okkur strákunum þar með. Við gengum yfirleitt þrír saman
að öllum verkum því sennilega er tíu ára strákum ekki treystandi til að
vera sjálfráða í bústörfunum.
Ketill var greinilega mjög vel að sér í öllum verkum er snertu búið og
kunni allt sem kunna þurfti og vel það. Samt eyddi hann ekki miklum tíma í
að ræða þá þætti við okkur. Honum lágu allt aðrir hlutir á hjarta. Þarna
birtist allt annar Ketill en hingað til og nú hófst eitt eftirminnilegasta
tímabil í lífi mínu. Dögum saman átti hann til að segja okkur framhaldssögu
af krökkum sem ferðuðust um heiminn í alls konar farartækjum, jafnt á láði
sem í legi og í lofti. Þau lentu í ævintýrum sem mig grunar að erfitt sé að
toppa því ímyndunarafli Ketils virtust engin takmörk sett.
Honum voru hugleikin tæknileg mál og átti það til að segja frá uppfinningum
sem hvergi voru til nema í frjóum huga hans. Ekki kæmi mér á óvart þó að
sumt það sem Ketill sá fyrir hugskotssjónum sé orðið að veruleika í dag.
Aðra daga var hann meira heimspekilega þenkjandi. Þá átti hann til að varpa
fram spurningu sem okkur strákunum var ætlað að svara. Þetta voru
spurningar sem virtust meinleysislegar í fyrstu. Þegar til átti að taka var
hins vegar gjarnan fátt um svör því spurningarnar leyndu á sér og reyndust
vel ígrundaðar. Þó að svörin létu á sér standa gekk Ketill mildilega eftir
svari. Þegar svarið loks kom tók hann ævinlega vel í það en kom svo með
mótbárur eða önnur sjónarhorn. Þetta gerði hann vingjarnlega eins og alltaf
og vildi greinilega ekki kveða okkur í kútinn með harkalegum mótbárum. Við
svöruðum síðan mótbárum hans og þá kom hann með enn ný sjónarhorn. Svona
gengu samræðurnar koll af kolli þar til umræðuefnið var rætt til þrautar og
lausn fengin. Síðar á ævinni þegar ég las um Sókrates og leit hans að
sannleikanum, datt mér strax Ketill í hug. Sókrates kallaði sig ljósmóður
sannleikans og aðferð hans, hin sókratíska aðferð, var að leiða í ljós
eigin vanþekkingu og annarra með spurningum sem í lokin leiddu sannleikann
í ljós. Aðferðir þessara tveggja hugsuða til að finna sannleikann voru
sannarlega mjög keimlíkar.
Framkoma Ketils við okkur strákana var með þeim hætti að vel mætti skrifa
um hana bók sem hægt væri að nota sem leiðbeiningarrit um það hvernig
fullorðnir ættu að umgangast börn. Aldrei kom sá dagur að hann hækkaði
róminn eða brýndi raustina við okkur né heldur ávítti hann okkur fyrir
nokkurn hlut. Var þetta óvenjulegt á þeim tíma því þá var algengt að
fullorðið fólk væri höstugt í framkomu við börn. Ketill var þvert á móti
ævinlega mildur og hlýr við okkur strákana og held ég þegar litið er til
baka að framkoma hans hafi mótast af því að hann hafði gaman af að
umgangast krakka og tel ég hann hafa verið á réttri hillu í lífinu hvað þau
störf varðar er hann vann á lífsleiðinni. Annað sem varla þarf að nefna er
að aldrei notaði hann óviðeigandi orðalag eða málfar við okkur. Þegar ég
lít til baka yfir öll árin sem við þekktumst og rifja upp samskiptin
minnist ég ekki eins tilviks þar sem Ketill hafi verið grófur í orðalagi.
Þvert á móti finnst mér einmitt að hann hafi ævinlega vandað mál sitt og
orðanotkun sem og fas allt og framkomu.
Þær stundir komu hins vegar að Ketill taldi orðin óþörf, að upplifunin ein
væri nóg. Eitt sinn sagði hann okkur strákunum að sækja gömlu jörpu merina
á bænum. Svo dró hann fram gamla hestakerru sem ég hafði haldið að væri
forngripur frá löngu liðnum tíma. Svo var þó ekki. Ketill beitti merinni
fyrir kerruna og settist á bekkinn með okkur félagana sinn til hvorrar
hliðar, báða upphafna yfir þessari mögnuðu lífsreynslu. Svo var haldið af
stað. Merin virtist hin sáttasta með hlutskipti sitt, fór fetið og hlýddi
góðlátlega hverri skipun ekilsins. Hægt var farið enda alls óvíst hversu
mikið álag merin eða kerran þyldu. Ekið var sem leið lá út veginn að
Vesturlandsveginum. Þar var beygt til hægri. Eftir stutta stund stöðvaði
Ketill för og bað okkur um að hjálpa sér við að taka niður gamla
gaddavírsgirðingu og rúlla vírnum upp og setja á kerruna. Verkið gekk
fljótt og vel. Að svo búnu var haldið til baka. Enginn sagði stakt orð á
bakaleiðinni heldur því þetta var mögnuð reynsla fyrir höfuðborgarstráka,
að sitja á hestakerru og hlusta á letilegt en taktfast hófatak merarinnar
og njóta kyrrðarinnar og friðarins sem ferðamátinn gaf.
Eins var þegar Ketill sagði okkur strákunum að koma með sér niður að á.
Þegar þangað var komið, lá við festar í bugðu á ánni þar sem hún var einna
dýpst, ein fallegasta julla sem ég hef séð. Hún var greinilega spónný og
máluð í þremur litum með olíumálningu. Ketill sagði okkur að vinur hans
hefði smíðað julluna. Bað hann okkur að sitja á afturþóftu. Sjálfur leysti
hann landfestar, settist á framþóftu og greip til ára. Síðan var róið fram
og aftur um nokkrar bugður á ánni sem var spegilslétt og djúp. Vatnið var
kristaltært þannig að vel sást til botns og seiðum sást bregða fyrir innan
um steina og botngróður. Ekki sagði Ketill eitt einasta orð meðan á
ævintýrinu stóð. Hann vissi að hér var orðum ofaukið, rétt eins og í
kerruferðinni áður.
Stundum stytti Ketill okkur stundir með ýmiss konar raddleikfimi. Hann gat
flautað með eyrunum og kunni búktal svo fátt eitt sé nefnt. Einnig hermdi
hann listilega eftir fuglum og öðrum dýrum. Komu þessir hæfileikar hans sér
einkar vel síðar á ævinni þegar hann tók þátt í Ínúk-sýningunum þar sem
hljóðmynd þeirra sýninga var að stórum hluta sköpuð og flutt af honum.
Ketill sagði mér einu sinni frá því þegar Ínúk-sýningarnar stóðu sem hæst,
að hann hefði hitt leikhúsmann á erlendri grundu sem hafði mikinn áhuga og
þekkingu á raddbeitingu. Þá var Ketill að æfa það sem hann kallaði double
talk sem þýðir eiginlega að hafa tungur tvær og tala sitt með hvorri
eins og máltækið segir, þannig að það var eins og tveir einstaklingar væru
að tala í senn. Hafði Ketill eftir leikhúsmanninum að þetta væri einstök
kunnátta og að hann vissi ekki um neinn sem gæti þetta nema Ketil.
Stundum tók Ketill sig til og söng kafla úr ítölskum óperuaríum. Þegar hann
var spurður hvernig hann gæti þetta, svaraði hann því til að hann kynni
ekki að syngja og enn síður kynni hann ítölsku. Honum var lagið að tala
langtímum saman á framandi tungumáli að því er virtist, oftast frönsku eða
ítölsku en í raun var Ketill að herma eftir hljóðgerð viðkomandi tungumáls
án þess í raun og veru að kunna það. Er það list sem ekki er öllum gefin.
Ketill hafði gaman af að segja þá sögu af kollega sínum Charlie Chaplin
þegar Chaplin stóð eitt sinn upp á mannamóti og söng ítalska aríu frá
upphafi til enda með miklum tilþrifum. Þegar lófatakinu linnti sögðu
viðstaddir að þeir hefðu ekki vitað að hann kynni að syngja, hvað þá svona
vel. Svaraði Chaplin þeim að hann kynni ekkert að syngja, hann hefði bara
verið að herma eftir Caruso!
Eftir dvöl mína á Engi liðu nokkur ár án þess að ég hitti Ketil. Svo
gerðist það að við eignuðumst sameiginlega vini. Þá fórum við að hittast
öðru hvoru og fréttum gjarnan hvor af öðrum gegnum þessa sameiginlegu vini
okkar. Þó að leiðir okkar hafi ekki oft legið saman um margra ára skeið, þá
gerðist ævinlega eitthvað sem varð til þess að við hittumst á ný og
endurnýjuðum gömul kynni. Alltaf var gaman og uppörvandi að hitta
Ketil.
Síðar á ævinni lá leið mín lengra en sem nemur upp í Mosfellssveit. Þá urðu
samfundir okkar enn færri. Þá gerist það eitt kvöldið fyrir allnokkrum árum
að síminn hringir í Túngötu 6, Suðureyri. Ég tek upp tólið og heyrði
gamalkunna rödd, Blessaður. Var þar Ketill kominn. Tókum við tal saman og
það var eins og öll árin hyrfu og við værum aftur komnir í Mosfellssveitina
þar sem ævintýrin eiga heima. Ketill sagði mér frá verkefni sem hann stæði
að með hópi mannvina sem gengi út á það að hjálpa þeim sem minna mættu sín
með margvíslegum hætti og bauð mér að taka þátt í starfinu. Var ég
reiðubúinn til þess en því miður kom fjarlægðin og margvíslegar annir mínar
á þeim tíma í veg fyrir að ég gæti tekið þátt í því göfuga verkefni.
Ketill lét ekki þar við sitja enda áhugamálin mörg og margvísleg. Honum var
hugstæð margs konar tækni og hann sagði mér frá bílum sem ganga fyrir ýmist
vatni eða lofti og fleiri tækninýjungum sem væri verið að þróa úti í hinum
stóra heimi. Einnig sagði hann mér frá heimasætu í afskekktum og
einangruðum dal. Þar bar að einn góðan veðurdag ungan mann sem einhvern
veginn tókst að komast í dalinn yfir fjöllin sjö. Honum var boðið að dvelja
á bænum og hóf hann þegar margs konar endurbætur á búinu. Einnig tókst
honum að rjúfa einangrun dalsins með nýstárlegum samgöngubótum sem Ketill
kunni öll deili á. Ungi maðurinn giftist að lokum heimasætunni. Stóðu þau
fyrir myndarlegu búi og eignuðust börn og buru. Margar aðrar sögur sagði
Ketill mér og hafði ég stórgaman af þeim öllum. Ekki létum við nægja að
tala saman í síma. Hittumst við ósjaldan á Mokkakaffi yfir kaffibolla þegar
leiðin lá í höfuðborgina.
Svo gerist það eitt sinn í spjalli við Sigurð bróður minn að hann fer að
tala um Ketil Larsen eins og þeir Ketill væru vel kunnugir. Þegar ég spyr
hann nánar út í málið kemur í ljós að þeir eru miklir og góðir vinir og
hafa verið um árabil. Þetta var enn eitt atvikið í langri keðju atvika þar
sem leiðir okkar Ketils lágu saman með óvæntum en skemmtilegum hætti. Þegar
mig svo rak upp á strendur landsins kalda haustið 2017 fannst okkur
félögunum upplagt að hittast yfir kaffibolla og meðlæti á bókakaffi
Eymundsson sem fyrr segir. Minningin er dýrmæt en um leið blandin söknuði
og vitund þess hversu allt er hverfult í heimi okkar.
Katli Larsen var gefin sýn inn í annan heim, heim þar sem ævintýrin eiga
sér stað og fjöllin og blómin eru litskrúðugri en jafnvel þau íslensku. Með
sögum sínum og myndum reyndi hann að miðla okkur hinum þeirri sýn er honum
stóð fyrir hugskotssjónum og var annars heims eins og hann sagði sjálfur.
Sennilega eru myndirnar hans aðeins fölleitar spegilmyndir þess veruleika
er honum opinberaðist í þeim heimum. Aldrei er að vita nema við félagarnir
þrír hittumst síðar í einhverjum hinna fullkomnu heima Ketils Larsen þar
sem ævintýrin og litirnir ríkja og setjumst niður yfir kaffibolla og kleinu
annars heims og ræðum málin út frá enn nýjum sjónarhól.
Valdimar Hreiðarsson.
Valdimar Hreiðarsson.