Dagný Guðmundsdóttir

When I think of angels,
I think of you.
With your flaming red hair,
and the things that do.
I heard you had left,
no it couldnt be true.
When I think of angels,
I think of you

(KK)

Ég var ekki gömul þegar við kynntumst fyrst, elsku Dagný mín, eða rétt 13 ára þegar símtölin milli Hraunhóla og Brekkubyggðar byrjuðu með mjög stuttu millibili. Eitt skiptið þegar Helgi svaraði ekki sjálfur og þú tjáðir mér að hann væri á æfingu og kæmi ekki fyrr en seint kom kveðjan ekki beint í kjölfarið. Þvert á móti! Þú ræddir við mig af athygli og spurðir mig áhugaverðra spurninga sem gerði það að verkum að kærastinn varð enn meira spennandi þar sem mamma hans var svo áhugasöm um mig. Það kom fljótt í ljós að þér var mjög umhugað að sonurinn kæmi vel fram og tókstu stöðuna með jöfnu millibili. Þegar árin liðu og kærustuparið unga ákvað að endurskrifa ástarsöguna varst þú heldur betur haukur í mínu horni. Flest vissir þú á undan syninum þar sem ég óskaði eftir handleiðslu þinni til að tryggja ráðahaginn. Stundum þóttu þér hugmyndir mínar of áhættusamar, eins og þegar ég kom honum á óvart sitjandi í hótelanddyri þar sem hann gisti í Búdapest. Þú hringdir í mig þegar ég var komin til Köben og spurðir hvort ég vildi ekki bara hætta við þetta, þar sem væri ómögulegt að vita hvernig hann myndi taka þessari uppákomu. Auðvitað hlustaði ég ekki enda trúi ég að þessi hættuför hafi skilað mér ávinningnum, ástríku hjónabandi og fjórum dásamlegum börnum. Talandi um hjónaband þá komst þú einmitt aftur til sögunnar en þar sem þolinmæði er ekki mín sterkasta hlið ákvað ég að tryggja stöðu mína í fjölskyldunni til frambúðar og biðja Helga míns. Ég ákvað eftir dvöl hans í Ameríku að fara "the American Way" og biðja um Dagnýju um hönd hans. Ég var nokkuð kokhraust með svarið og var búin að útbúa afsal sem hún þurfti að skrifa undir og sagði í leiðinni: Verði þér að því, ég ábyrgist ekkert og gallaðir hlutir eru ekki skilavara! Hún kunni að svara fyrir sig og segja þessa hnyttnu brandara sem voru oftar en ekki voru á kostnað hennar allra nánustu en samt sagt með svo mikilli elsku.

Elsku Dagný mín, öll spjöllin sem við höfum átt spanna óteljandi klukkustundir. Við gátum talað um allt milli himins og jarðar og aldrei kastaðist í kekki, nema einu sinni þegar þú lést mig nú vita að ég kæmist ekki upp með að panta einhverja læknatíma eða tala við lækna á bak við þig. Ég tók pillunni en reyndi að benda þér eins vel og ég gat á áhyggjur okkar með öðrum hætti sem stundum náðu í gegn og stundum ekki. Þú fórst nefnilega þínar eigin leiðir, vildir garfa í málunum sjálf, athuga hvað væri í stöðunni. Það var þér líkt enda víðlesin og áhugasöm um svo ótalmargt.

Ég sakna þín nú þegar ofursárt, það er skrítið að hringja ekki til að spjalla um matseld, heilsuna, nýjustu tísku, hver staðan sé á ástarmálum yngri kynslóðarinnar og margt margt fleira. Ég vildi að ég hefði mátt létta þér lífið meira, að tíminn eftir að Nonni dó hefði verið þér léttari. En við eigum þá dásamlegu minningu að hafa farið utan og verið öll saman nú fyrir rétt rúmu ári. Þó svo heilsuleysið hafi haft áhrif eru minningarnar svo dýrmætar, óheyrilega fyndnar og samveran svo mikilvæg. Það geymum við djúpt í hjörtum okkar allra.

Að lokum langar mig að þakka þér fyrir að vera tengdamamma mín og einn mesti töffari sem ég þekki. Takk fyrir að stuðla ávallt að sjálfstæði mínu sem skipti þig miklu máli og vildir að ég tileinkaði mér betur. Takk fyrir að kenna mér að elda jólamat fjölskyldunnar og öll ófáu ráðin varðandi eldamennsku. Takk fyrir að segja mér hve hryllilega illa bleikur varalitur fer mér og kalla mig glysdrottninguna þína. Takk fyrir að eignast litla gúmmítöffarann þinn með spörfuglshjartað sem er stoð okkar allra og stytta nú sem áður. Takk fyrir vináttu þína og elsku í minn garð og að skilja eftir þann dýrmæta jarðveg sem þið Nonni gerðuð.

Ég mun skála við þig inn í eilífðina, passa upp á fólkið þitt, varðveita það sem ykkur var mikilvægt en umfram allt annað hlakka til endurfunda okkar þegar sá tími kemur.

Mín ást til þín, elsku Dagný og knús á Nonna.

Amma Dagný var mjög góðhjörtuð og skemmtileg, hún var með frábæran húmor og var meistari í gátum og elskaði að grínast. Það var alltaf svo gaman heima hjá henni, hún eldaði bestu nautalundirnar og ég sakna hennar mikið. Mér hefur alltaf fundist hún frábær kona eins og hún var. Þegar við stoppuðum í heimsókn fengum við krakkarnir alltaf súkkulaðikex og hún vildi alltaf vera með okkur, fyrir það er ég svo þakklátur og fyrir allt sem þú gerðir.

Amma, mér finnst svo leiðinlegt að ég kom stundum ekki nógu oft í heimsókn og nú sé ég mjög eftir því. Það kenndi mér samt að maður þarf alltaf að gera sitt besta og nota tímann sinn vel og maður getur ekki alltaf hugsað til baka heldur á alltaf að horfa fram. Þetta verður erfitt en ég veit að þú ert á betri stað. Mér finnst við hafa búið til frábærar minningar og nú ert þú komin til afa Nonna líka. Ég er svo glaður að við fengum svo góða ömmu sem vildi alltaf hitta okkur og eyða tíma í að tala við okkur. Ég vona að ég geti hitt ykkur afa aftur þegar að því kemur hjá mér. En það er ein minning sem stendur upp úr og það var í Flórída, það var alveg svakaleg ferð og enn betri með þér, við vorum að skemmta okkur og fórum í sundlaugina og á matastaði og allt þetta var svakaleg ferð með þér. Sjáumst vonandi í himnaríki.


Guð geymi þig. Þinn