Hreinn Einarsson fæddist 19. ágúst 1945 á Akureyri og ólst upp hjá ömmu sinni Kristínu, afa sínum Sigurði og móðursystur sinni Bertu. Hreinn lést í faðmi fjölskyldu sinnar á Skógarbrekku HSN 3. júlí 2022.
Foreldrar Hreins voru Erla Sigurðardóttir, f. 19. janúar 1926, d. 2. febrúar 1965, og Einar Eggertsson, f. 9. ágúst 1925, d. 11. nóvember 1985.
Systkini Hreins sammæðra eru: Hrafnhildur Garðarsdóttir, f. 19. janúar 1949, Björn Harðarson, f. 21. janúar 1954, Sigrún Harðardóttir, f. 30. mars 1956, Sigurður Harðarson, f. 2. febrúar 1958, og Erla Kristín Harðardóttir, f. 18. júní 1962.
Systkini Hreins samfeðra eru: Laufey Brynja, f. 22. desember 1947, Gunnar Rafn, f. 12. júní 1949, Hulda, f. 8. september 1949, Hallfríður Lilja, f. 1. febrúar 1951, Gunnar, f. 28. janúar 1954, d. 4. ágúst 1982, Birgir, f. 11. ágúst 1955, og Anna, f. 30. september 1964.
Eftirlifandi eiginkona Hreins er Sigríður Kristín Gunnlaugsdóttir, f. 3. júlí 1948 á Húsavík. Börn þeirra eru: 1) Gunnlaugur Karl, f. 30. maí 1966, maki Árninna Ósk Stefánsdóttir, f. 19. júlí 1969, börn þeirra eru Karolína Kristín Gunnlaugsdóttir, f. 1989, í sambúð með Gunnari Sævarssyni, f. 1979. Börn Karolínu eru Heimir Örn og Lovísa Ósk. Aníta Ösp Gunnlaugsdóttir, f. 1992, og Ágúst Már Gunnlaugsson, f. 1997. 2) Sigurður, f. 4. mars 1972, maki Harpa Gunnur Aðalbjörnsdóttir, f. 11. desember 1973. 3) Erla Kristín, f. 2. júní 1976, kærasti Jóel Þórðarson, f. 2. október 1966, börn Erlu eru Sigríður Kristín Ólafsdóttir, f. 1997, maki Kristján Orri Unnsteinsson f. 1997, dætur þeirra eru Dagbjört Erla og Aldís Anna. Guðrún María Erludóttir, f. 25. maí 2000, og Hreinn Kári Ólafsson, f. 12. október 2005. 4) Berta María, f. 21. maí 1978, eiginmaður Ragnar Hermannsson, f. 19. apríl 1980, synir þeirra eru Hermann Veigar Ragnarsson, f. 2005, Sigurður Karl Ragnarsson, f. 2008, og Kristófer Aron Ragnarsson, f. 2015. 5) Sveinn Veigar, f. 17. október 1979, börn hans eru Sandra María Sveinsdóttir, f. 2007, og Daníel Sævar Sveinsson, f. 2010.
Hreinn og Sigríður giftu sig 20. ágúst 1967 og bjuggu á Húsavík alla sína ævi saman.
Hreinn ólst upp á Akureyri og stundaði nám í barna- og gagnfræðaskóla þar. Strax eftir gagnfræðapróf fór hann á sjó og stundaði sjómennsku í nokkur ár, eða þar til hann hóf nám í Iðnskóla Húsavíkur haustið 1966 og lærði þar bifvélavirkjun sem hann vann við alla sína tíð.
Útför Hreins fer fram frá Húsavíkurkirkju í dag, 13. júlí 2022, kl. 14.00.
Elsku hjartans pabbi minn, það verða þung skref að taka er við kveðjum
þig í hinsta sinn í dag, en jafnframt léttir mér örlítið til, að vita til
þess að þú sért kominn á betri stað og þarft ekki að kljást lengur við þann
sjúkdóm sem þú varst með. Það er margs að minnast, margs að sakna og ekki
síst margs að þakka. Þú varst alltaf boðinn og búinn að rétta mér
hjálparhönd, alveg sama hvað það var. Ósjaldan stóðst þú í hjólreiða
viðgerðum fyrir mig, svo kom skellinöðru tímabilið hjá mér og loks
bílarnir, ef það var eitthvað að þá varst þú alltaf kallaður til, til að
lagfæra og græja, þú hafðir nefnilega lúmskt gaman að þessu öllu saman og
ekki síður varstu á heimavelli þegar þú varst undir bíl eða ofan í húddi að
lagfæra það sem þurfti. Ekki var það bara bílar og vélar sem þú varst góður
í að gera við, heldur var það allt mögulegt og eftir að maður fór að búa
sjálfur þá komst þú alltaf eins og kallaður til að aðstoða við ýmsar
framkvæmdir, hvort sem var að smíða, glerja, leggja gólfefni, mála,
pípuleggja eða skipta um heilu húsþökin, þú varst nefnilega völundur í
höndum og þúsund þjala smiður. Það var fátt sem þú gast ekki gert, það var
einna helst eldamennskan, það verður að viðurkennast að það var ekki þinn
heimavöllur, mamma sá alfarið um það og passaði alltaf að nóg væri á borðum
og allir fengju nóg.
Bílskúrinn var þinn griðastaður, þar leið þér vel og ófá verkefnin sem þú
tókst að þér fyrir hina og þessa og flest, ef ekki öll, eiga það
sameiginlegt að þú tókst aldrei neitt fyrir það, gerðir þetta ánægjunnar
vegna og ef einhver bað þig um eitthvað þá var það alltaf já, þú varst mjög
slæmur í að segja nei nefnilega svona yfir höfuð. Við systkinin nýttum
okkur það óspart er við vorum lítil, t.a.m. um helgar er þið mamma voruð
enn sofandi á morgnana og við krakkarnir vildum eitthvað, sem við vissum
vel að við mættum ekki fá, þá spurðum við þig alltaf hvort við mættum fá
þetta og fá hitt, þú muldraðir þá alltaf já já, með mismikilli hrifningu
frá mömmu er hún kom á fætur.
Alltaf var allt í röð og reglu hjá þér, öll verkfæri á sínum stað, hvort
sem var í áhaldahúsinu þar sem þú vannst í yfir 40 ár eða bílskúrnum heima.
Þú nefnilega vildir geta gengið að hlutunum vísum og sagðir oft við mömmu
er hún var búin að týna lyklunum eða gleraugunum sínum að hún ætti alltaf
að leggja þetta frá sér á sama stað, þá þyrfti hún ekki vera að leita að
þessu alsstaðar, svo einfalt væri það.
Alltaf varstu okkur góður og vildir okkur vel, þú varst ekki alltaf að sýna
það neitt sérstaklega en ég fann það alltaf hjá þér að þér þótti vænt um
okkur. Margar minningar koma upp í huga minn er ég rita þessi orð og þær
mun ég geyma vel. Þegar þú gafst mér heitan andardrátt í eyrað til að
minnka þjáningar mínar vegna heiftarlegrar eyrnabólgu sem var tíður gestur
hjá mér er ég var smákrakki, ekki var ég hár í loftinu er þú sast með mig
undir stýri á bláa Galant-inum og leyfðir mér að keyra, rétt náði niður á
bensíngjöf og sá varla yfir stýrið, allar árlegu ættarútilegurnar með
föðursystkinum þínum og fjölskyldum þeirra, utanlandsferðirnar sem við
fórum í, spila kana við eldhúsborðið fram á nótt, allar bílskúrsstundirnar,
matartímar þar sem þú bauðst mér alltaf grænar baunir vitandi að ég borðaði
þær ekki, þær voru jú í uppáhaldi hjá þér og þú alltaf jafn hissa er ég
neitaði þeim, þú settir þær meira að segja út á skyr í eitt skiptið já
þetta er aðeins brot af þeim minningum sem koma upp í hugann og það er
margt sem þú kenndir mér og ég bý enn að í dag og er ég þakklátur fyrir
það.
Eftir að þú greindist með alzheimer fyrir nokkrum árum síðan vissi ég að
leiðin hjá þér myndi liggja niður á við, það var erfitt að horfa og vita
til þess, að þú sem alltaf hafði verið svo líkamlega hraustur og handlaginn
mundir missa heilsuna hægt og bítandi. Og eftir því sem sjúkdómurinn óx
ásmegin með árunum þá varð verkstol einnig meir hjá þér og einföldustu verk
fyrir þér hér áður fyrr voru orðin erfiðari að leysa. Ekki varstu vanur að
biðja um hjálp og þú vildir gera hlutina sjálfur, en mamma var alltaf á
vaktinni og lét okkur systkinin vita er þú þyrftir á hjálpinni að halda og
bað okkur að kíkja á þig í skúrinn ef svo bæri undir. Það var æði oft sem
ég hristi hausinn og hló inn í mér er ég mætti og sá hvað þú varst búinn að
vera brasa. Eins ömurlegur og Alzheimer sjúkdómurinn er, og fer illa með
fólk, þá býr hann einnig til ótal skemmtilegar minningar fyrir okkur hin
sem standa eftir og þær, elsku pabbi minn, bjóst þú sko til eins og þér er
einum lagið. Það er nefnilega þannig að þú getur horft á glasið ýmist hálf
tómt eða hálf fullt, ég ákvað að velja síðari kostinn hvað varðar veikindi
þín og höfðum við systkinin það oft á orði að það væri ekki annað hægt en
að hlægja og brosa að þessu öllu saman og öllum þínum uppátækjum þó svo að
alvarleikinn væri ekki langt undan. Þú sýndir mér aldrei neina reiði né
illsku í þínum veikindum, eins algengt og það er með fólk með þennan
sjúkdóm, heldur varstu alltaf sama ljúfmennið, allt frá því ég man fyrst
eftir mér og þar til ævi þinni lauk. Þannig mun ég ævinlega minnast þín,
ljúfur, góður og hjálpsamur.
Elsku pabbi minn, takk fyrir allt saman sem þú hefur gert fyrir mig og
börnin mín gegnum árin.
Ég elska þig.
Þinn sonur,Hreinn
Sveinn Veigar.