Yfir 100 þúsund Bretar hafa lýst yfir áhuga á að hýsa flóttamenn frá Úkraníu, að sögn Borisar Johnson, forsætisráðherra landsins.

Bresk stjórnvöld hafa hvatt heimili í landinu til að taka vel á móti flóttamönnunum.

„Það er magnað að yfir 100 þúsund manns og stofnanir hafa skráð áhuga sinn á því að styðja Úkraínumenn á flótta frá stríðinu,“ tísti Johnson á Twitter.

„Takk allir, víðsvegar um landið, sem hafa stigið fram og boðist til að hjálpa,“ bætti hann við, innan við sólarhring eftir að verkefnið „Heimili fyrir Úkraínu“ var sett á laggirnar.

Samningaviðræður Úkraínu og Rússlands eru hafnar á nýjan leik, að sögn stjórnvalda í Kænugarði.

Viðræðunum í gær lauk án niðurstöðu og var ákveðið að halda þeim áfram í dag.

Borgarstjórinn í Kænugarði segir að fjórir hafi fundist látnir eftir loftárásir Rússa á borgina í nótt.

„Slökkviliðsmenn eru enn að slökkva eldana frá því snemma í morgun,“ sagði Vitali Klitschko á Telegram.

Fyrst var greint frá því að tveir hefðu látist eftir árásirnar á fjölbýlishús í borginni.

Rússneskar hersveitir hafa náð fullri stjórn yfir héraðinu Kherson í suðurhluta Úkraínu, að sögn talsmanns rússneska varnarmálaráðuneytisins.

Í myndbandi sem var birt í fyrr í vikunni sáust íbúar borgarinnar mótmæla hernámi Rússa þrátt fyrir að hersveitir þeirra hleypt af skotum í varúðarskyni.

Bresk stjórnvöld hafa sett á 35% innflutningsskatt á vörur frá Rússlandi, þar á meðal vodka. Útflutningur á lúxusvörum til Rússlands hefur einnig verið bannaður.

„Við viljum valda stríðsvél Pútíns [Rússlandsforseta] sem mestum skaða um leið og við viljum að áhrifin á breskt viðskiptalíf verði sem minnst,“ sagði í yfirlýsingu.