..og ekki gekk heldur að koma spennu á tengivirkið í Hrútartungu núna á sjötta tímanum, segir Landsnet.

Ljósmyndarinn Einar Guðmann á Akureyri tók þessar myndir í miðbænum á Akureyri í mogun, en í gær og dag kyngdi niður snjó.

„Eitthvað þessu líkt bíður línumanna eftir óveðrið,“ skrifar Þórhallur Þorsteinsson og birtir myndir af raflínum á Hallormsstaðahálsi í klakaböndum.

Strætó er byrjaður að keyra aftur á landsbyggðarleiðum í nágrenni höfuðborgarsvæðisins, samkvæmt tilkynningu.

Hellisheiðin er opin og strætóleiðir á Suðurlandi eru byrjaðar að aka skv. áætlun. Ferðir milli Reykjavíkur og Borgarness ganga skv. áætlun, en tvísýnt er með ferðir á Snæfellsnesi.

Ekki verður ekið til og frá Akureyri í dag. Allar ferðir á Norður- og Norðausturlandi falla niður í dag.

„Veðrið hefur gengið talsvert niður en enn er gert ráð fyrir hvassviðri og erfiðri færð á vegum, hálku og krapa,“ segir í tilkynningu frá lögreglunni á Austurlandi vegna óveðursins. Rafmagn er einnig komið á flestum stöðum, eftir rafmagnstruflanir dagsins.

Gert er ráð fyrir að helstu vegir á Austurlandi verði lokaðir áfram, svo sem frá Djúpavogi til suðurs, Fjarðarheiði, Fagradal, Möðrudalsöræfi, Vopnafjarðarleið og Vatnsskarð.

Vegfarendur eru hvattir til að leggja ekki í tvísýnu og að fylgjast með upplýsingum um lokanir vega á vef Vegagerðarinnar.

Mynd hér að neðan er frá lokunarpósti þjóðvegarins við Hvalsnes í Hamarsfirði og tekin af Kristjáni Ingimarssyni.