Einn af vinsælustu tapasréttum Spánar eru rækjur í hvítlauksolíu eða Gambas al Ajillo. Þetta er fljótlegur og einfaldur réttur og mikilvægt að hafa nóg af góðu brauði með við borðið til að geta fullnýtt bragðmikla sósuna.

• 600 g rækjur
• 2 dl ólívuolía
• 6 stórir hvítlaukgeirar, grófsaxaðir
• 1 tsk chiliflögur
• 1 msk paprika
• safi úr einni sítrónu
• 1 lúka fínsöxuð steinselja

Hitið olíuna að miðlungshita á stórri pönnu. Setjið hvítlaukinn og chiliflögurnar út í olíuna og látið malla í 2-3 mínútur. Hækkið þá hitann og bætið rækjunum út á. Steikið þær í olíunni í 2 mínútur en þá er paprikukryddinu og sítrónusafanum bætt út á. Leyfið að malla aðeins áfram í 1-2 mínútur, sáldrið þá steinseljunni yfir og berið strax fram.

Uppskrift: vinotek.is