Súrsætur kjúklingaréttur og dýrindis eggjakaka er meðal þess sem má gera úr afgöngum af bragðmikla kjúklingaréttinum sem sýndur var í síðasta þætti af Korter í kvöldmat (ef einhverjir afgangar eru). Réttirnir eru sem áður ótrúlega einfaldir og fljótlegir, frábærir til að töfra fram eftir annasaman dag.

Omelettuveisla

Skerið afganga af kjúklingi, fenneli og gulrótum í litla bita og hitið í örbylgjunni. Létthrærið (ekki píska) eggin og saltið og piprið. Takið stærstu pönnu heimilisins og hitið á henni ólífuolíu. Þegar hún er orðin meðalheit er eggjunum hellt út á og látin steikjast. Þegar eggjakakan er steikt, hellið þá kjúklingaafgöngunum yfir helminginn af omelettunni og síðan er omelettunni lokað. Færið síðan varlega á disk og skerið í tvo helminga (uppskriftin dugar einmitt fyrir tvo) og berið fram með steinselju og gúrku mojito-sósunni.

Súrsætt kjúklinga-„tvist“

Hellið ólífuolíu á pönnu og setjið chili út á. Þar næst eru afgangarnir settir á pönnuna og þessu velt vel saman. Hellið úr einni krukku af súrsætri sósu út á pönnuna og látið suðuna koma upp í 2–3 mínútur þannig að bragðið af kjúklingaafganginum blandist sósunni. Skreytið með steinselju og berið á borð fyrir fjölskylduna ásamt hrísgrjónum. Rétturinn dugar fyrir fjóra og því tilvalinn fyrir margar fjölskyldur.

Ásdís Ásgeirsdóttir

Omelettuveisla

• afgangar af kjúklingi með fennel og gulrótum
• 5 egg
• salt og pipar
• steinselja
• ólífuolía til steikingar

Súrsætt kjúklinga-„tvist“

• chilipipar, tekinn í tvennt, fræin hreinsuð og skorinn smátt
• kjúklingaafgangar, skornir smátt
• olífuolía
• 1 krukka súrsæt sósa
• steinselja, smátt skorin
• hrísgrjón

Tengdar fréttir

Korter í kvöldmat

Ómótstæðilegar quesadillas á augnabliki

• Svo miklu meira en jólamatur
• Grísk lambapíta með engri fyrirhöfn
• Eins grískt og það getur orðið
• Best á öðrum degi

» Fleiri tengdar fréttir

• Blogga um frétt