Matur | mbl | 1.11.2016 | 16:00 | Uppfært 19:45

Himneskar bollakökur Evu Laufeyjar

Ingibjörg Rósa er dyggur stuðningsmaður og aðstoðakokkur móður sinnar. Karl Petersson

Evu Laufeyju Kjaran Hermannsdóttur þarf vart að kynna. Hún hefur á stuttum tíma orðið einn ástsælasti sjónvarpskokkur landsins enda með einlæga og skemmtilega framkomu í bland við ómótstæðilegar uppskriftir. Á fimmtudaginn kemur út önnur matreiðslubók hennar sem ber nafnið Kökugleði Evu. Myndirnar eru einstaklega girnilegar en þær tók Karl Petersson en hann hefur sérhæft sig í matarljósmyndum um árabil og starfaði lengi á Gestgjafanum.

Karl Petersson

Himneskar vanillubollakökur með karamellukremi

250 g sykur

140 g smjör, við stofuhita

3 egg við stofuhita

250 g hveiti

1 tsk. lyftiduft

2 dl rjómi

2 tsk. vanilla extract eða vanillusykur (það er líka gott að nota fræin úr vanillustöng)

Bollakökuform

Aðferð: Hitið ofninn í 180°C. Þeytið saman smjör og sykur í um það bil þrjár mínútur, bætið einu og einu eggi saman við. Þeytið vel á milli. Sigtið saman hveiti og lyftiduft, bætið hveitiblöndunni, vanillu og rjómanum saman við eggjablönduna og þeytið mjög vel í nokkrar mínútur þar til blandan verður silkimjúk. Skiptið deiginu niður í bollakökuform og bakið við 180°C í 15-18 mínútur. Kælið kökurnar mjög vel áður en þið smyrjið á þær krem. Uppskriftin gefur 18-20 bollakökur.

Karamellusmjörkrem

230 g smjör, við stofuhita

500 g flórsykur

2 tsk. vanilluduft eða dropar

150 g hvítt súkkulaði

4 msk. söltuð karamellusósa + meiri til þess að skreyta kökurnar

Aðferð:

Þeytið saman smjör og flórsykur, bræðið hvítt súkkulaði yfir vatnsbaði og hellið saman við og þeytið áfram. Bætið vanillu og saltaðri karamellusósu í kremið í lokin og þeytið þar til kremið er silkimjúkt. Setjið kremið í sprautupoka og sprautið á kökuurnar, skreytið kökurnar gjarnan með saltaðri karamellusósu og nóg af henni.