Matur | mbl | 1.12.2016 | 15:04 | Uppfært 20:05

Jólalegt hnetubuff

Guðrún Bergman gaf nýverið út bókina Hreint mataræði. Bókin hefur greinilega átt vel við því aðeins eru eftir örfá eintök á lager. Guðrún er alsæl með viðtökurnar en hún gefur bókina út sjálf. Spurð um jólalega uppskrift úr bókinni segir hún hnetubuffið vera klassískt en um leið hátíðlegt. „Mér datt í hug þessi uppskrift að hnetubuffunum, því þau eru þannig að það er hægt að frysta þau og eiga tilbúin þegar t.d. kemur að jólum - eða ef einhver gestur í jólaboðinu er grænmetisæta - og hafa þá tilbúinn rétt fyrir hann. Sósuna þarf hins vegar að gera sama dag og hennar er neytt," segir Guðrún en uppskriftin birtist upphaflega í bók eftir Guðrúnu og Guðríði Hannesdóttur, Eldað undir Jökli.

Guðrún Bergmann hefur lengi barist fyrir því að fólk hugi betur að eigin heilsu og hreinu mataræði. Árni Sæberg

„Buffin urðu að klassískum grænmetisrétti á matseðli okkar þegar við fórum að reka Hótel Hellna. Hér eru þau að sjálfsögðu í glútenlausri útgáfu. Þyki buffin heldur bragðlítil er bara að bíða eftir sósunni, því hún er svo sannarlega mikilvæg með þessum rétti.“

Buffin:

2 msk. sykurlaust möndlusmjör (má nota kasjúhnetu- eða jarðhnetusmjör en möndlusmjörið finnst mér best)
4 msk. rísmjólk eða rísmjólk með kókos
3 egg
1 meðalstór smátt saxaður rauðlaukur
1 bolli heilar hafraflögur
1 tsk. kjúklingakrydd
½–1 tsk. fínt himalajasalt
bragð- og lyktarlaus kókosolía eða steikingarolía

Blandið saman í góðum blandara sykurlausu möndlusmjöri, hrísgrjónamjólk og eggjum.
Saxið laukinn smátt og setjið hann ásamt höfrum og kryddi í hrærivélarskál.
Hellið eggjablöndunni rólega saman við meðan hrært er.
Látið deigið standa í u.þ.b. 1 klst. áður en buffin eru steikt, til að hafrarnir dragi vel í sig vökvann. Það gæti þurft að bæta örlítið meiri mjólk út í deigið fyrir steikingu.
Hitið olíu á pönnu og setjið deigið á hana með meðalstórri skeið. Steikið buffin við miðlungshita og gætið þess að þau ofsteikist ekki, því þá er hætta á að þau þorni.

Þegar búið er að steikja buffin er gott að raða þeim í eldfast mót, setja álpappír yfir og halda þeim heitum í 100°C heitum ofni meðan sósan er útbúin.

Sósan:

2–3 msk. bragð- og lyktarlaus kókosolía eða steikingarolía
1 lítill rauðlaukur, mjög fínt saxaður
3 pressuð hvítlauksrif
örlítið af cayenne-pipar
4 msk. möndlusmjör (má nota kasjúhnetu- eða jarðhnetusmjör)
2–3 msk. glútenlaus tamarisósa (smakkið ykkur áfram því hún er bragðmikil)
1½–2 msk. nýpressaður sítrónusafi
1 tsk. Sweet Like Sugar-strásæta eða 5 stevíudropar
4 dl sykurlaus rísmjólk
fínt himalajasalt eftir smekk

Hitið olíuna í litlum potti. Steikið lauk og hvítlauk við miðlungshita í 2–5 mínútur.
Takið pottinn af hellunni og blandið hnetusmjöri, tamarisósu, sítrónusafa, hrásykri og kryddi út í hann og hrærið vel saman.
Þynnið sósuna með rísmjólk, setjið pottinn aftur á helluna og hrærið í þar til sósan jafnast. Verði hún of þunn má láta sjóða aðeins upp á henni og þá þykknar hún.

Hugmynd! Berið buffin og sósuna fram með góðu blönduðu grænmetissalati, salatsósu og hýðishrísgrjónum eða kínóa.